ვლადიმერ პუტინსა და ნიკოლ ფაშინიანს შორის სატელეფონო საუბარი შედგა. კრემლის ცნობით, პრემიერმინისტრმა ნიკოლ ფაშინიანმა პუტინს 8 აგვისტოს ვაშინგტონში აშშ-ის პრეზიდენტ დონალდ ტრამპთან და აზერბაიჯანის პრეზიდენტ ილჰამ ალიევთან შეხვედრის შესახებ დეტალური ინფორმაცია მიაწოდა. მათივე ინფორმაციით, საუბრის ინიციატორი ერევანი იყო.

"ვლადიმერ პუტინმა ერევანსა და ბაქოს შორის მდგრადი მშვიდობის უზრუნველყოფის გადადგმული ნაბიჯების მნიშვნელობა აღნიშნა.

ვლადიმერ პუტინმა ასევე დაადასტურა რუსეთის მზადყოფნა, ხელი შეუწყოს სომხეთ-აზერბაიჯანის კონფლიქტის მოგვარებას 2020-2022 წლების უმაღლეს დონეზე სამმხრივი შეთანხმებების შესაბამისად, მათ შორის რეგიონში სატრანსპორტო კომუნიკაციების განბლოკვას", — ნათქვამია ოფიციალურ განცხადებაში.

რუსეთის პრეზიდენტმა ფაშინიანს აშშ-ის პრეზიდენტის სპეციალურ წარმომადგენელ სტივენ ვიტკოფთან საუბრის ძირითადი შედეგებისა და დონალდ ტრამპთან ალასკაში შეხვედრისთვის მზადების შესახებ მიაწოდა ინფორმაცია.

"სომხეთის პრემიერმინისტრი მიესალმა უკრაინის კრიზისის მშვიდობიანი გზით მოგვარებისკენ მიმართულ ნაბიჯებს", — განაცხადა კრემლმა.

გარდა ამისა, რუსეთის პრეზიდენტმა და სომხეთის პრემიერმინისტრმა განიხილეს ორმხრივი ურთიერთობები, ხაზი გაუსვეს სავაჭრო და საინვესტიციო თანამშრომლობისა და ევრაზიული ეკონომიკური კავშირის ფარგლებში ურთიერთქმედების შემდგომ განვითარებას.