"ოცნების" პრემიერმა, "ქართული ოცნების" თავმჯდომარემ და საარჩევნო შტაბის ხელმძღვანელმა, ირაკლი კობახიძემ 63 მუნიციპალიტეტში მერობის კანდიდატები წარადგინა. მისი თქმით, ახალციხეში "ოცნების" მერობის კანდიდატი "ტვ იმედის" ჟურნალისტი ვარლამ წიკლაური იქნება.

კობახიძის თქმით, წარსადგენი 63 კანდიდატიდან უმრავლესობა მოქმედი მერი ან მერის მოვალეობის შემსრულებელია.

მერობის კანდიდატებს შორისაა ასევე კახეთის საოლქო პროკურორის მოქმედი მოადგილე ვაჟა მაღრაძე, პარლამენტის წევრი დათო კოდუა და ყოფილი პარლამენტარი — ჯუმბერ იზორია.

ოცნების პრემიერი დარწმუნებულია, რომ უკლებლივ ყველა კანდიდატი მოიგებს არჩევნებს შესაბამის მუნიციპალიტეტში.

"ჩვენი ამოცანა არის ცხადი — ეს არის მთელი ქვეყნის მასშტაბით 64-ვე მუნიციპალიტეტში როგორც მერის, ისე საკრებულოს არჩევნების მოგება. კვლევებიც ადასტურებს იმას, რომ ეს არის აბსოლუტურად რეალური და რეალისტური ამოცანა. ბუნებრივია, ჩვენი საარჩევნო შტაბი, პარტია იქნება მაქსიმალურად მობილიზებული, იმისათვის, რომ ამ შედეგს მივაღწიოთ. წარმატებებს ვუსურვებ მერობის კანდიდატებს", — განაცხადა კობახიძემ.