ტყიბულში, მინდელის სახელობის შახტში 6 მუშა დაიღუპა, 3 დაშავდა. ინფორმაციას შინაგან საქმეთა სამინისტრო ავრცელებს.

გამოძიების პირველადი ინფორმაციით, შახტის ერთ-ერთ გვირაბში მოხდა კედლების დეფორმაცია, რასაც ჭერის ჩამოშლა მოჰყვა. შემთხვევის შედეგად, სხეულის მძიმე დაზიანებები მიიღეს შახტის მიწისქვეშა სამთო ოსტატმა, ოსტატ-ამფეთქებელმა და ოთხმა სამთო მუშამ. ყველა მათგანი, მიღებული დაზიანებების შედეგად, გარდაიცვალა.

ჩამონგრევის დროს, ამავე შახტში მყოფმა სამთო ოსტატმა და ორმა სამთო მუშამ ჯანმრთელობის დაზიანებები მიიღეს. ისინი ამ დროისთვის საავადმყოფოში არიან გადაყვანილი.

უწყებაში ამბობენ, ამ დროისთვის, შემთხვევის ადგილას მყოფი მუშები უსაფრთხო ადგილას გადაყავთ.

მომხდარ ფაქტთან დაკავშირებით გამოძიება საქართველოს სსკ-ს 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს. დანაშაული 5 წლამდე თავისუფლების აღკვეთას ითვალისწინებს.