თბილისის საქალაქო სასამართლოში აქტივისტ იოსებ (იოსკა) ჯანდიერს 7-დღიანი პატიმრობა მიუსაჯეს — გადაწყვეტილება მოსამართლე ზვიად ცეკვავამ მიიღო.

9 აგვისტოს, რუსთაველის გამზირზე პოლიციელებმა ჯანდიერი დააკავეს. გავრცელებულ ვიდეოში ჩანს თუ როგორ უსწორდება ფიზიკურად პოლიციელი დაკავებულ აქტივისტს.

აქტივისტს ადმინისტრაციულ სამართალდარღვევათა კოდექსის 166-ე და 173-ე მუხლების დარღვევას ედავებოდნენ, რაც პოლიციელისადმი დაუმორჩილებლობას და წვრილმან ხულიგნობას გულისხმობს. პარტია ახალის ერთ-ერთი წევრის, ნინო გოგინაშვილის ინფორმაციით, ჯანდიერის ადვოკატები თავისუფლების აღკვეთის სანაცვლოდ ჯარიმის დაწესებას ითხოვდნენ, რაზეც პროკურატურამ განაცხადა, რომ აქტივისტს გზის გადაკეტვისთვის მრავალი გადაუხდელი ჯარიმა აქვს და ამ აღმკვეთ ღონისძიებას "აზრი არ აქვს".