ოცნების ხელისუფლების ინფრასტრუქტურის მინისტრის, რევაზ სოხაძის მე-5 მოადგილედ ბათუ გურჯიძე დაინიშნა. გადაწყვეტილებას ხელი 4 აგვისტოს, ოცნების ხელისუფლების პრემიერმინისტრმა, ირაკლი კობახიძემ მოაწერა.

ის 2025 წლიდან ოცნების ხელისუფლების ინფრასტრუქტურის სამინისტროს ეკონომიკურ დეპარტამენტს ხელმძღვანელობს. აქამდე, 2014-დან 2025 წლამდე რეგიონული განვითარებისა და ინფრასტრუქტურის სამინისტროში იყო ეკონომიკური დეპარტამენტის ხელმძღვანელი.

ინფრასტრუქტურის სამინისტროს ვებგვერდზე განთავსებული ინფორმაციით, ბათუ გურჯიძემ საჯარო სექტორში საქმიანობა 2009 წელს დაიწყო და 16 წელზე მეტი პროფესიული გამოცდილება აქვს სახელმწიფო ფინანსური მენეჯმენტის, საბიუჯეტო დაგეგმვისა და ეკონომიკური ანალიზის მიმართულებით. სხვადასხვა პერიოდში იგი ხელმძღვანელობდა ფინანსური პოლიტიკის, საფინანსო-საბიუჯეტო და ეკონომიკური ანალიზის სამმართველოებს, მათ შორის, რეგიონული განვითარებისა და ინფრასტრუქტურის, ასევე შრომის, ჯანმრთელობისა და სოციალური დაცვის სამინისტროებში. აქვს კერძო სექტორში მუშაობის გამოცდილებაც.

ბათუ გურჯიძეს პროფესიით ეკონომისტია, მიღებული აქვს განათლება ივანე ჯავახიშვილის სახელობის თბილისის სახელმწიფო უნივერსიტეტში ეკონომიკისა და კომერციისა და მარკეტინგის ფაკულტეტებზე.