სოციალური სამართლიანობის ცენტრის (SJC) განცხადებით, 2024 წლის ნოემბერ-დეკემბერში, თბილისში, რუსთაველის გამზირზე გამართული საპროტესტო აქციის მონაწილეების მიმართ საქართველოს შინაგან საქმეთა თანამშრომლების მხრიდან გამოვლენილ ძალადობრივ ქმედებებთან დაკავშირებით მიმდინარე გამოძიების ფარგლებში, შსს-ს ყოფილი და მოქმედი მაღალჩინოსნების მიმართ სისხლისსამართლებრივი დევნის დაწყება ოფიციალურად მოითხოვეს.

განცხადებაში ვკითხულობთ, რომ გამოძიება ოცნების სპეციალურ საგამოძიებო სამსახურს ევალებოდა, მაგრამ უწყების გაუქმების შემდეგ, საქმე პროკურატურას გადაეცა. ცენტრის ინფორმაციით, სპეციალურმა საგამოძიებო სამსახურმა გამოძიება სისხლის სამართლის კოდექსის 333-ე (უფლებამოსილების გადამეტება) და 154-ე (ჟურნალისტური საქმიანობისთვის ხელშეშლა) მუხლებით დაიწყო.

სოციალური სამართლიანობის ცენტრის ინფორმაციით, მათი დაცვის ქვეშ 60-მდე დაზარალებული პირი იმყოფება და მათ სპეციალური საგამოძიებო სამსახურის მასალებზეც ჰქონდათ წვდომა. ცენტრი განცხადებაში ხაზს უსვამს, რომ აქციის მონაწილეებზე ძალადობა ხდებოდა დაკავების პროცესში და ძალის გადამეტება შსს-ს კუთვნილ ავტომობილებში გრძელდებოდა.

ცენტრის მოთხოვნაა:

  • საქმეზე კვალიფიკაციის შეცვლის აუცილებლობა: სოციალური სამართლიანობის ცენტრმა მოითხოვა საქმეზე სისხლისსამართლებრივი კვალიფიკაციის შეცვლა და გამოძიების გაგრძელება საქართველოს სისხლის სამართლის კოდექსის 1441-ე, 1443-ე, 178-ე მუხლებით (რაც წამებას, დამამცირებელ, არაადამიანურ მოპყრობას და ძარცვას გულისხმობს), ვინაიდან სს (სპეციალური საგამოძიებო) სამართლის საქმის მასალების მიხედვით, შსს გდდ-ს თანამშრომლებმა აქციის ცალკეული მონაწილეების მიმართ უფლებამოსილების გადამეტების მიღმა წამება, არაადამიანური მოპყრობა და ძარცვა ჩაიდინეს;
  • შსს-ს მაღალი მენეჯერული რგოლის და უშუალოდ საპროტესტო აქციების მართვაზე პასუხისმგებელი პირების, მათ შორის, გდდ-ს დეპარტამენტის ყოფილი დირექტორის ზვიად ხარაზიშვილის გამოკითხვა, მათი კუთვნილი მობილური ტელეფონების, კომპიუტერული ტექნიკის გამოღება და ელექტრონული ფორმით განხორციელებული კომუნიკაციის შესწავლა;
  • რაციების სისტემაზე კომპიუტერულ-ტექნოლოგიური ექსპერტიზის ჩატარებისა და ოტო-დან შესაბამისი პირების გამოკითხვის აუცილებლობა: სს საქმის მასალებით დგინდება, რომ საპროტესტო აქციების მიმდინარეობისას შსს-ს თანამშრომლები იყენებდნენ ხელის რადიოსადგურებს ე.წ. "რაციებს", რომელთა ტექნიკურ უზრუნველყოფაზე პასუხისმგებელია სახელმწიფო უსაფრთხოების სამსახურის ოპერატიულ-ტექნიკური სააგენტო.
  • ვიდეო ჩანაწერების ამოღების აუცილებლობა დაკავებული პირების გადასაყვანი სატრანსპორტო საშუალებებიდან
  • გდდ-ს ყოფილი თანამშრომლობის, ირაკლი შაიშმელაშვილის გამოკითხვის აუცილებლობა.

განცხადებაში ასევე ვკითხულობთ, რომ გდდ-ს ხარაზიშვილი სათანადოდ არ ასრულებდა, მასზე, როგორც გდდ-ს დირექტორზე დაკისრებულ მოვალეობებს — სპეციალური ეკიპირების მქონე, გდდ-ს ნიღბიანი თანამშრომლები არ იყვნენ აღჭურვილნი სპეციალური ამოსაცნობი ნიშნებით, რის გამოც მათი მხრიდან ჩადენილი დანაშაულებრივი ქმედებები დაუსჯელი დარჩა.

სოციალური სამართლიანობის ცენტრის ინფორმაციით, მათ აქვთ გონივრული ეჭვი, რომ სპეციალური საგამოძიებო სამსახური ზრუნავდა სამხილების განადგურებაზე, რაც საქმის გამოძიებას აფერხებდა.