თბილისის საქალაქო სასამართლომ თავდაცვის ყოფილი მინისტრი ჯუანშერ ბურჭულაძე და 2 პირი — ამავე საქმის ფარგლებში დაკავებული თავდაცვის ყოფილი მინისტრის მოადგილე გიორგი ხაინდრავა და ჯუანშერ ბურჭულაძის ცოლის ძმა, ვასილ მხეიძე წინასწარ პატიმრობაში დატოვა.

სასამართლომ არ დააკმაყოფილა დაცვის მხარის შუამდგომლობა მისი დაცვის ქვეშ მყოფის გირაოს სანაცვლოდ გაეთავისუფლებინათ.

ბურჭულაძემ სასამართლო პროცესზე განაცხადა, რომ მისი ჯანმრთელობის მდგომარეობა წინასწარ პატიმრობაში დამძიმდა და ის ყოველდღიურ რეაბილიტაციას საჭიროებს. ფორმულას ინფორმაციით, ჯუანშერ ბურჭულაძემ ასევე განაცხადა, რომ მისი ჯანმრთელობის პრობლემა მხოლოდ საზღვარგარეთ იკურნება და კიდევ ერთხელ შეახსენა სასამართლოს, რომ ის 8 შვილის მამაა.

"ბატონო მოსამართლევ, თქვენ ბრძანეთ, რომ არსებითად რა შეიცვალაო. არსებით გარემოებად ჩემი ჯანმრთელობის მდგომარეობა დაასახელა დაცვის მხარემ. ამას ვადასტურებ. ეს საჭიროებს ყოველდღიურ რეაბილიტაციას. კერძოდ, სახსრის მასაჟებს და ა.შ. და ეს ვერ ხერხდება პენიტენციურ დაწესებულებაში. მეორე, არსებითად რაც შეიცვალა აღკვეთის ღონისძიებასთან დაკავშირებით. აღკვეთის ღონისძიების ყველაზე მკაცრი ფორმა, პატიმრობა, შეიძლება შეეხებოდეს ძალადობრივ დანაშაულებს. დაცვის მხარე სწორედ ამას ასაბუთებს, რომ მიზანშეწონილი არაა, ჩვენს საქმეში ყველაზე მკაცრი ზომა იყოს გამოყენებული.

მტკიცებულებები რაც უკვე დასრულდა ბრალდების მხარის მიერ მოპოვება დასრულდა, ვერ გასცდა ირიბ და დაუსაბუთებელ მტკიცებულებებს. ეს არის ზუსტად ის არსებითი გარემოება, რაც შეიცვალა.

აქამდე ბრალდების მხარეს ჰქონდა დრო მოეპოვებინა მტკიცებულებები, რაც შეიძლება მოსამართლისთვის გამხდარიყო საფუძველი მკაცრი ღონისძიების გამოყენებისთვის. არსებითად შეიცვალა ის, რომ ბრალდების მხარემ ვერ მოიპოვა ვერც ერთი პირდაპირი მტკიცებულება," — განაცხადა ბურჭულაძემ.

სასამართლო პროცესის შემდეგ პროკურორმა, ანა ლეკიაშვილმა IPN-თან საუბრისას განაცხადა, რომ ბურჭულაძის საქმეში 135 მოწმეა, რომელთაგანაც ათეული დაიკითხა და დაადასტურა ბრალდებულების ბრალეულობა. რაც შეეხება ვლადიმერ ღუდუშაურს, პროკურორის განცხადებით ბრალდებულს მას შემდეგ შეეცვალა აღმკვეთი ღონისძიება გირაოთი, რაც მან გამოძიებასთან ითანამშრომლა, დანაშაული აღიარა და ბურჭულაძის წინააღმდეგ ჩვენება მისცა.

"დღევანდელ პროცესზე განხილულ იქნა შუამდგომლობები მტკიცებულებათა დაშვების თაობაზე.

მოცემულ შემთხვევაში, ბრალდების მხარეს სასამართლოში წარმოდგენილი აქვს არაერთი მტკიცებულება, მათ შორის, დაახლოებით 135 მოწმე, ჩატარებულია ათეულობით ექსპერტიზა, გამოკითხულია ათეულობით მოწმე, ასევე წარმოდგენილია სხვადასხვა სახის დოკუმენტაცია, რომლებიც პირდაპირ ადასტურებენ აღნიშნული პირების ბრალეულობას," — განაცხადა პროკურორმა.

შეგახსენებთ, 11 სექტემბერს, თავდაცვის ყოფილი მინისტრი ჯუანშერ ბურჭულაძე სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. მას 9-დან 12 წლამდე პატიმრობა ემუქრება. შემდეგი სხდომა 3 ნოემბერს ჩაინიშნა.