განათლების სამინისტროს ინფორმაციით, ბოლო კვირის მონაცემებით, სკოლებში ინფიცირების მაჩვენებელი კვლავ შემცირდა. უწყების განცხადებით კორონავირუსი დაუდასტურდა მასწავლებლების 0,9%-ს, ხოლო მოსწავლეების — 0,3%-ს, რაც წინა კვირის მაჩვენებელთან შედარებით ნაკლებია. 22 ოქტომბრის მონაცემებით, მასწავლებლების 1,1%-ს, ხოლო მოსწავლეების — 0,5%-ს ჰქონდათ ვირუსი.

უწყების ინფორმაციით, ბოლო კვირის მონაცემის მიხედვით, საქართველოს მასშტაბით დისტანციურ სწავლებაზე გადავიდა 218 სკოლა და 415 კლასი, რაც წინა კვირის მონაცემებთან შედარებით, ასევე, დაბალი მაჩვენებელია. ამასთან, სამინისტროს განცხადებით, სკოლებში ვაქცინაციის პროცესი გრძელდება და დღეის მონაცემებით, მასწავლებლებისა და სკოლის ადმინისტრაციული პერსონალის 69,6%.

"სწავლის სასკოლო სივრცეში განახლებიდან დღემდე საქართველოს მასშტაბით დისტანციურ სწავლებაზე იმყოფება რისკის ჯგუფის 142 მასწავლებელი.

საქართველოს განათლებისა და მეცნიერების სამინისტრო სკოლებში Covid-19-ის ვირუსის პრევენციის მიზნით აქტიურად მუშაობს სხვადასხვა მიმართულებით. ასევე აქტიურად მიმდინარეობს Covid-19-ზე მასწავლებელთა ტესტირება. სკოლები სრულად არიან აღჭურვილი პანდემიის პრევენციისათვის სასწავლო წლის ბოლომდე საჭირო რესურსების მარაგით", — წერია სამინისტროს განცხადებაში.

უწყება მოუწოდებს სკოლებს, მაქსიმალურად დაიცვან ჯანდაცვის სფეროს რეკომენდაციები, აქტიურად ჩაერთონ ვაქცინაციის პროცესში.