აქტიური და საინტერესო სტუდენტური ცხოვრება; კვლევები, კონფერენციები და სიმპოზიუმები; საზოგადოებასთან ურთიერთობისა და კომუნიკაციის სფეროში წარმატებული ქართველი და უცხოელი ლექტორები და პრაქტიკული სამუშაო სასიამოვნო გარემოში, ლოფტის ტიპის თანამედროვე დიზაინის მქონე შენობაში — ესაა ის მცირე ჩამონათვალი, რომელსაც მართვისა და კომუნიკაციების საერთაშორისო უნივერსიტეტი, ალტერბრიჯი თავის მომავალ სტუდენტებს სთავაზობს.

კომუნიკაციების უნივერსიტეტი ეკოლოგიურ და უსაფრთხო გარემოში, ბაგებში, ყოფილი სტუდქალაქის ტერიტორიაზე მდებარეობს. თანამედროვე და მიმზიდველი დიზაინით დაგეგმარებული შენობის სტრუქტურა უზრუნველყოფს, რომ სტუდენტებმა კომფორტულ და თავისუფალ გარემოში იმეცადინონ და მიიღონ საჭირო ცოდნა, გამოცდილება და პრაქტიკული უნარები.

"ალტერბრიჯი დამაკავშირებელი ხიდია მეცნიერებას, საზოგადოებას, განათლებასა და დასაქმებას შორის", — აცხადებენ უნივერსიტეტში.

"გაბედე იყო ალტერი ალტერბრიჯთან ერთად" — ეს საკმაოდ თამამი განაცხადი უნივერსიტეტის პოზიციონირების ერთ-ერთი მთავარი გზავნილი გახდა.

"ჩვენმა პროგრამებმა სრულად უნდა შეცვალოს PR-ის დონე საქართველოში. ჩვენი კურსდამთავრებულები იქნებიან კომუნიკაციის ფსიქოლოგები, რომლებსაც ექნებათ საზოგადოებრივი აზრის ჩამოყალიბების, ნეიროლინგვისტური პროგრამირების უნარები, რომლებიც მზად იქნებიან, შექმნან სწორი კონტენტი და მოარგონ ის საზოგადოებრივ ინტერესებს. ჩვენ უნდა შევქმნათ პიროვნული და პროფესიული თვითრეალიზების ახალი, საუკეთესო შესაძლებლობები და ხელი შევუწყოთ განათლებით დასაქმების პერსპექტივას", —აღნიშნავს უნივერსიტეტის რექტორი, ნათია გოცაძე.

მისი განცხადებით, სტუდენტები ცოდნას უშუალოდ პრაქტიკოსი სპეციალისტებისგან მიიღებენ და თავიდანვე ჩაერთვებიან საკომუნიკაციო აქტივობებში.

ალტერბრიჯის პარტნიორი ორგანიზაციები კომუნიკაციების სფეროს სხვადასხვა მიმართულებით მუშაობენ: მედია, სარეკლამო ინდუსტრია, მსხვილი კომპანიები თუ საჯარო უწყებები. ყველა ეს ორგანიზაცია მზადაა, ალტერბრიჯის სტუდენტებს თეორიული თუ პრაქტიკული ცოდნის და უნარების ათვისებაში დაეხმარონ.

თავდაპირველად PR აკადემია შეიქმნა. აკადემია, რომელიც 7 წელია, ლიდერობს არაფორმალური განათლების სფეროში, უნივერსიტეტის დამფუძნებელი გახდა. როგორც ალტერბრიჯში აღნიშნავენ, მათი მიზანი ქვეყანაში საზოგადოებასთან ურთიერთობის, კომუნიკაციის დარგის განვითარებაა.

უნივერსიტეტს ასევე მჭიდრო კონტაქტები აქვს სხვადასხვა უმაღლეს სასწავლებელთან მსოფლიოს მასშტაბით, რაც წარმატებულ სტუდენტებს გაცვლითი პროგრამებით სხვადასხვა ქვეყნის პრესტიჟულ უნივერსიტეტებში სწავლის შესაძლებლობას აძლევს. აღნიშნული კონტაქტების მეშვეობით, ალტერბრიჯში პერიოდულად იგეგმება პარტნიორი უნივერსიტეტების პროფესორების და ლექტორების ჩამოყვანაც, რომლებიც შესაბამის კურსებს გაუძღვებიან.

რაც შეეხება მომავალ დასაქმებას, ნათია გოცაძის განცხადებით, ალტერბრიჯი კომუნიკაციების სფეროში ახალ პროფესიონალებს გაზრდის, რომლებიც თავიანთ სიტყვას იტყვიან ამ მიმართულებით.

"სტრატეგიული კომუნიკაცია დღეს სჭირდება ყველას, ვისთვისაც საზოგადობრივი აზრი, ლოიალური მომხმარებელი, რეპუტაცია და გრძელვადიანი ურთიერთობებია მნიშვნელოვანი. ჩვენი კურსდამთავრებულები იქნებიან პროფესიონალები, რომლებიც შექმნიან ამ ღირებულებებს. ალტერბრიჯი მისცემს მათ საშუალებას, გახდნენ ბაზარზე ინოვატორი ლიდერები, სტრატეგები, რომლებიც საკომუნიკაციო პოლიტიკას აბსოლუტურად ახალ დონეზე აიყვანენ", — აღნიშნავს რექტორი.

ალტერბრიჯმა 6-წლიანი უპირობო ავტორიზაცია მიიღო, რაც იმას ნიშნავს, რომ საგანმანათლებლო სფეროს კონკურენტულ ბაზარზე კიდევ ერთი საინტერესო და მრავალმხრივი შესაძლებლობების მქონე უნივერსიტეტი გამოჩნდა. საზოგადოებრივი ურთიერთობები და კომუნიკაციის ფსიქოლოგია ბაკალავრებისთვის, სტრატეგიული კომუნიკაცია მაგისტრებისთვის — თითოეულ ამ მიმართულებას ადგილობრივ და საერთაშორისო დონეზე გამოცდილი და თავიანთ სფეროში წარმატებული პროფესორები გაუძღვებიან.

ალტერბრიჯში სამაგისტრო პროგრამებზე განაცხადის მიღება 20 აგვისტოდან 11 სექტემბრამდე მიმდინარეობს.