საქართველოს პარლამენტის იურიდიულ საკითხთა კომიტეტის სხდომაზე პირველი მოსმენით უნდა განიხილონ კანონპროექტი რელიგიური გრძნობების შეურაცხყოფის აკრძალვის შესახებ.

საკანონმდებლო ინიციატივის ავტორები საქართველოს პატრიოტთა ალიანსის წევრი, ემზარ კვიციანი და ჰომოფობიური და ქსენოფობიური შინაარსის მქონე ორგანიზაციის, საქართველოს დემოგრაფიული საზოგადოება 21-ის ხელმძღვანელი ზვიად ტომარაძე არიან.

კვიციანი მოითხოვს, რომ რელიგიური გრძნობების შეურაცხყოფა დასჯადი გახდეს. ის ფიქრობს, რომ სანქცია არ უნდა შეეხოს სასულიერო პირს, რომელიც სხვა რელიგიურ გრძნობებს ამბიონიდან ქადაგების დროს შეურაცხყოფს.

პატრიოტთა ალიანსის წევრის ემზარ კვიციანის ინიციატივა, რომლის მიხედვითაც რელიგიური გრძნობების შეურაცხყოფა დასჯადი უნდა გახდეს, პარლამენტის ადამიანის უფლებათა კომიტეტში 2018 წლის აპრილში განიხილეს.

საპარლამენტო უმრავლესობის დეპუტატები ინიციატივას პრინციპულ დონეზე დაეთანხმნენ, თუმცა შენიშვნები შეიტანეს და კანონპროექტის დახვეწის მიზნით, სამუშაო ჯგუფის შექმნა დაანონსეს.

კვიციანის ინიციატივას კრიტიკა მოჰყვა, როგორც არასამთავრობო სექტორში ისე რელიგიურ ორგანიზაციებში. კანონპროექტს გამოეხმაურა პლატფორმა "არა ფობიას!". ის მიიჩნევს, რომ ინიციატივა ზღუდავს გამოხატვის თავისუფლებას, ეწინააღმდეგება ქვეყნის კონსტიტუციასა და საერთაშორისო სტანდარტებს. მათივე განცხადებით ეს საზოგადოების კრიტიკული აზრის ჩახშობის მცდელობაა.

კანონპროექტს ეთანხმება საქართველოს მართლმადიდებელი ეკლესია, თუმცა აცხადებს, რომ ამან სიტყვის თავისუფლება არ უნდა შეზღუდოს. ამის შესახებ On.ge-ს 2018 წლის აპრილში, კანონპროექტის განხილვის პარალელურად პროტოპრესვიტერმა გიორგი ზვიადაძემ უთხრა.

სსიპ სრულიად საქართველოს მუსლიმთა უმაღლესი სასულიერო სამმართველოს თავმჯდომარე, შეიხი მირტაგი ასადოვი ამბობდა, რომ კანონპროექტი საქართველოს საპატრიარქოზეა მორგებული. გარდა ამისა, მისი მიღების შემთხვევაში, შესაძლოა, ადამიანის გამოხატვის უფლება შეიზღუდოს.

კანონპროექტი რელიგიური გრძნობების შეურაცხყოფაზე

კანონპროექტის წარმოდგენილი ვერსიით მიღების შემთხვევაში, რელიგიური სიწმინდეების, რელიგიური ორგანიზაციის, ღვთისმსახურისა და მორწმუნის მიმართ სიძულვილის საჯაროდ გამოხატვა ან/და ისეთი მასალის გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას დაისჯება ჯარიმით, ან თავისუფლების აღკვეთით ვადით 1 წლამდე.

რელიგიური შენობების და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება ან დაზიანება კი ორ წლამდე თავისუფლების აღკვეთით დაისჯება.

ზვიად ტომარაძის ავტორობით რელიგიური გრძნობების შეურაცხყოფაზე კანონპროექტი პარლამენტში უკვე მეორედ განიხილეს. პირველად 2016 წელს, მაშინ რელიგიური გრძნობების შეურაცხყოფა მხოლოდ ადმინისტრაციულ სამართალდარღვევასა და შესაბამისად, ჯარიმას ითვალისწინებდა. მაშინ კომიტეტმა წარმოდგენილ ინიციატივას მხარი არ დაუჭირა და კანონპროექტის დახვეწის რეკომენდაციით მიმართა.

ამავე თემაზე: