საქართველოს ყოფილი გენერალური პროკურორი ოთარ ფარცხალაძე ოჯახთან ერთად მოსკოვში 9 მაისის გამარჯვების აღლუმზე მიიწვიეს, ამის შესახებ ტვ პირველს პრორუსული პარტია სოლიდარობა მშვიდობისთვის წარმომადგენელმა მამუკა ფიფიამ განუცხადა .

"დიახ, დაპატიჟებულია მოსკოვში. ჩვენ უნდა ჩავატაროთ, პარალელურად, ღონისძიება თბილისში, ამიტომ აღარ ვიცით

ახლა როგორ ვქნათ —- ჩავიდეთ, თბილისში ჩავატაროთ თუ მოსკოვში ვიყოთ 9 მაისს, ამას ვარკვევთ ახლა.

ბატონი ოთარ ფარცხალაძე, რომანოვი-ფარცხალაძე არის დაპატიჟებული თავის ოჯახთან ერთად. რა თქმა, უნდა დაესწრება", — ამბობს მამუკა ფიფია.

შეგახსენებთ, რომ აშშ-მა საქართველოს ყოფილ გენერალურ პროკურორს სანქციები 2023 წლის 14 სექტემბერს დაუწესა. აშშ-ს სახელმწიფო დეპარტამენტის ინფორმაციით, ოთარ ფარცხალაძე რუსეთის ფედერაციის უშიშროების ფედერალურ სამსახურის აგენტი იყო და მუშაობდა იმისთვის, რომ გავლენა მოეხდინა ქართულ საზოგადოებასა და პოლიტიკაზე რუსეთის სასარგებლოდ, წერს SOVA.

17 ოქტომბერს საქართველოს მე-5 პრეზიდენტმა სალომე ზურაბიშვილმა ყოფილ თანამდებობის პირს საქართველოს მოქალაქეობა ჩამოართვა. ასევე ვრცელდება ინფორმაცია, რომ ყოფილმა გენერალურმა პროკურორმა გვარი შეიცვალა და რომანოვი გახდა.

2013 წელს ოთარ ფარცხალაძე საქართველოში მთავარ პროკურორის თანამდებობაზე იყო. ის ამ თანამდებობაზე 7 ნოემბერს დაინიშნა, ხოლო იმავე წლის 30 დეკემბერს თანამდებობა დატოვა.