1-ელ აპრილს "ბათუმელმა მედროშემ", თემურ ქათამაძემ შიმშილობა მეორედ დაიწყო.

ამის შესახებ მის წერილში ვკითხულობთ. ქათამაძემ ასევე დასძინა, რომ ის გიორგი ჩიკვაიძეს მხარდაჭერას უცხადებს. ცნობისთვის ბიზნესმენი გიორგი ჩიკვაიძე უკვე 21-ე დღეა შიმშილობს.

"მე, "ბათუმელი მედროშე" თემურ ქათამაძე პირველი აპრილიდან ახალ შიმშილობას ვაცხადებ და ვუძღვნი თურქეთის ეთნიკური ქართველების, "ჩვენებურების" "ბელადს", ახმედ მელაშვილს.

რა თქმა უნდა, ბრძოლის ეს ფორმა ჩემთვის უკვე სიმბოლურია, როგორც 9 ძმა ხერხეულიძე.

ვუცხადებ სრულ მხარდაჭერას და სოლიდარობას გიორგი ჩიკვაიძეს.

ჩემგან განსაკუთრებული მოკითხვა "ავტოფაგიის ოსტატს", აფგან მუხთარლის.

სადაც არ უნდა ვიყოთ, რა პირობებშიც არ უნდა ვიყოთ, ჩვენი ბრძოლა ყველგან გაგრძელდება ბოლომდე, დიდებულად, გამარჯვებამდე.

ანწუხელიძე უკვდავია და მარადიულია.

"არასდროს, არასდროს არ დანებდე!".

ცნობისთვის, თემურ ქათამაძემ 48-დღიანი შიმშილობა 5 მარტს შეწყვიტა. 4 მარტს ის კლინიკაში გადაიყვანეს. "საქართველოს ახალგაზრდა იურისტთა ასოციაციის" ცნობით, შიმშილობის ამ პერიოდში მას უკვე დაკლებული ჰქონდა 20 კილოგრამზე მეტი.

თემურ ქათამაძე ბათუმის პოლიციის სამმართველოსთან 11 იანვარს დააკავე. მან პროტესტის ნიშნად, 48-ე დღე იშიმშილა. როგორც ქათამაძე ამბობდა, დაკავების დროს მასზე ფიზიკურად იძალადა ბათუმის პოლიციის უფროსმა ირაკლი დგებუაძემ.

თემურ ქათამაძე ათ წელზე მეტია საქართველოში ცხოვრობს და მოქალაქეობის მინიჭებაზე არაერთხელ მიმართა საქართველოს ხელისუფლებას, თუმცა უარი მიიღო. მას საქართველოში ცხოვრების უფლების არქონას ედავებიან.

18 მარტს, სასამართლომ თემურ ქათამაძეს ლტოლვილის სტატუსზე უარი უთხრა. გადაწყვეტილება მოსამართლე დიანა ფარქოსაძემ გამოაცხადა. თემურ ქათამაძემ სხდომის გადადების შუამდგომლობაც დააყენა, თუმცა მოსამართლემ შუამდგომლობა არ დააკმაყოფილა.

"ბათუმელმა მედროშემ" სასამართლო პროცესზე განაცხადა, რომ მიგრაციის დეპარტამენტის ადმინისტრაციამ კლინიკა "ვივამედის" მონაწილეობით "სპეცოპერაცია ჩაატარა" — ბათუმელ მედროშეს 48-დღიანი შიმშილობის შემდეგ კვების აღდგენის მკურნალობა არ ჩაუტარეს და მას ნორმალური პაციენტისთვის განკუთვნილ საკვებს აძლევდნენ.