მამუკა მდინარაძე ფირინგზე ოცნების პრემიერის გადაწყვეტილებას გამოეხმაურა იმის შესახებ, რომ შეიქმნას მთავრობის საქმიანობის ეფექტიანობის დეპარტამენტი. მისი თქმით, მთავრობის საქმიანობის ეფექტიანობის დეპარტამენტი გააკონტროლებს სამინისტროების, სსიპ-ების აიპ-ების და აღმასრულებელი ხელისუფლების სხვადასხვა რგოლის გადაწყვეტილებათა შესრულების ეფექტიანობა.

"მინდა გამოვეხმაურო საქართველოს პრემიერმინისტრის გადაწყვეტილებას, შეიქმნას მთავრობის საქმიანობის ეფექტიანობის დეპარტამენტი.

ეს არის ბოლო პერიოდის ერთ-ერთი ყველაზე მნიშვნელოვანი გადაწყვეტილება, რომელიც საშუალებას მისცემს ახლადშექმნილ დეპარტამენტს, რომ გააკონტროლოს სამინისტროების, სსიპ-ების აიპ-ების და აღმასრულებელი ხელისუფლების სხვადასხვა რგოლის გადაწყვეტილებათა შესრულების ეფექტიანობა.

საზოგადოებისათვის ცნობილია, რომ პრემიერმინისტრად ირაკლი კობახიძის დამტკიცების დროს, გუნდმა ერთ-ერთ მთავარ პრიორიტეტად გამოაცხადა კორუფციასთან ბრძოლა და სახელმწიფო სახსრების ხარჯვის მაქსიმალური კონტროლი. მიუხედავად იმისა, რომ ამ კუთხით გასული ერთი წლის განმავლობაში არაერთი რეფორმა გატარდა, ჩვენ ვფიქრობთ, რომ კიდევ უფრო მკაცრად უნდა მოხდეს გადასახადების გადამხდელთა სახსრების, იგივე საბიუჯეტო თანხების ხარჯვის კონტროლი.

ჩვენ ამ თემაზეც გვქონდა საუბარი უმრავლესობის ფორმატში თანაგუნდელებთან და არ გაგიკვირდებათ თუ ვიტყვით, რომ პრემიერმინისტრის ამ გადაწყვეტილებას გუნდის მხრიდან სრული მხარდაჭერა აქვს.

ჩვენ, მოგეხსენებათ, რომ გვაქვს ძალიან ამბიციური გეგმები ამასთან დაკავშირებით და როდესაც გუნდი აცხადებს, რომ ჩვენ უნდა ვიყოთ ერთ-ერთი პირველები მსოფლიოში კორუფციასთან ბრძოლასთან მიმართებით, რომ უნდა გვქონდეს ამ მიმართულებით საუკეთესო შედეგები, ეს არ არის მარტივი და დღევანდელი გადაწყვეტილება პრემიერ-მინისტრს მხოლოდ მიეხმარება ამ მიზნის შესრულებაში", — განაცხადა მამუკა მდინარაძემ.