"ბრიყვულ განცხადებას ბრიყვები აკეთებენ, ხართ ბრიყვი?" — ასე მიმართა პარლამენტის დროებითი საგამოძიებო კომისიის სხდომაზე, კომისიის თავმჯდომარე თეა წულუკიანმა გენერალ მამუკა ყურაშვილს. კომისიის მიმდინარეობის ჩანაწერის ტექსტს IPN ავრცელებს.

თეა წულუკიანმა, მამუკა ყურაშვილს 2008 წლის აგვისტოს ომის დღეებში ჟურნალისტთან გაკეთებული განცხადება შეახსენა.

"ამ სიტყვებს ამბობთ, "ქართულმა ძალოვანმა სტრუქტურებმა, გადაწყვიტა კონსტიტუციური წესრიგის აღდგენა მთელ ამ რეგიონში". ეს არის თქვენი განცხადება, სიტყვა-სიტყვით. ამ განცხადებას სააკაშვილის ზარის მერე აკეთებთ, სანამ ზაზა გოგავა ცეცხლს გახსნის? მარტივ ენაზე გესაუბრებით", — მიმართა წულუკიანმა ყურაშვილს.

თავის მხრივ, მამუკა ყურაშვილმა აღნიშნა, რომ ამის შესახებ უფრო უკეთესად დაკითხვის ოქმში არის ნახსენები და ახლა კი, ამ დეტალს ვერ იხსენებს.

ამის შემდგომ წულუკიანმა მას კვლავ ჰკითხა, ტერმინი - „კონსტიტუციური წესრიგი“ თვითონ მოიფიქრა იმ წუთში, თუ მანამდე კიდევ იყო გაჟღერებული, რაზეც მამუკა ყურაშვილმა უპასუხა, რომ აღნიშნული ტერმინი თავად მოიფიქრა.

"ჩემით მოვიფიქრე. აკადემია მაქვს დამთავრებული და ვიცი, რომ როცა ბანდფორმირებაა შენს მიწა-წყალზე და დროებითი კონტროლი აქვს დაწესებული... რა თქმა უნდა, ეს ჩემი გამოთქმა იყო. ამ განცხადების გაკეთება ჩემთვის არავის დაუვალებია. კარალეთის გზაზე, 7 აგვისტოს ღამე, ჟურნალისტი გადამეყარა და გავაკეთე [განცხადება]", — განაცხადა მამუკა ყურაშვილმა.

თეა წულუკიანმა ყურაშვილს ჰკითხა, აღნიშნული განცხადების გაკეთების შემდგომ, უსაყვედურა თუ არა მას ვინმემ, რაზეც ყურაშვილმა დადებითი პასუხი გასცა.

"კი, რა თქმა უნდა. გოგავას არ უსაყვედურია, მაგრამ სააკაშვილმა გააკეთა განცხადება, რომ "ბრიყვული განცხადება“იყოო, თუ რაღაც", — აღნიშნა ყურაშვილმა.

ამის შემდგომ, თეა წულუკიანმა სხდომაზე მსხდომ გენერალს შემდეგი კითხვა დაუსვა.

"ბრიყვულ განცხადებას ბრიყვები აკეთებენ, ხართ ბრიყვი?", — ჰკითხა წულუკიანმა ყურაშვილს, რომელმაც საპასუხოდ აღნიშნა, "არა, ნამდვილად არ ვარ".

"მაშინ რატომ გიწოდათ ბრიყვი, უმაღლესმა მთავარსარდალმა?" — ჰკითხა წულუკიანმა ყურაშვილს, რაზეც კვლავ საპასუხოდ ყურაშვილმა წულუკიანი სააკაშვილისკენ გადაამისამართა.

"არ ვიცი, ჰკითხეთ მას", — აღნიშნა ყურაშვილმა და განმარტა, რომ მის მიერ გაკეთებული განცხადება ადგილობრივი მოსახლეობისთვის იყო სასიცოცხლო მნიშვნელობის.

ცნობისათვის, დროებითი საგამოძიებო კომისიის დღევანდელ სხდომაზეც განსახილველი საკითხი 2004-2008 წლებში საქართველოს ოკუპირებულ ტერიტორიებზე შექმნილი ვითარება და 2008 წლის აგვისტოს ომია.

დროებით საგამოძიებო კომისიაში 2008 წლის მონაწილეების დაბარებამ საზოგადოებაში რეაქცია და პროტესტი გამოიწვია. ილიაუნის სტუდენტური მოძრაობამ განცხადება გაავრცელა, სადაც საზოგადოებას მოუწოდებენ, რომ კომისიის მუშაობის გასაპროტესტებლად პარლამენტთან მოვიდნენ:

"ახლა ჩვენს თანამოქალაქეებს, ჩვენს ისტორიასა და გმირებს ამცირებენ!
ნაომარი ქვეყანა ბოდიშს არ მოიხდის.

გამოდი, პარლამენტის უკან გელოდებით!", — ნათქვამია განცხადებაში.
აქცია პარლამენტთან 16:00 საათზე გაიმართება.