პარლამენტის ადამიანის უფლებათა კომიტეტის სხდომაზე რელიგიური გრძნობების შეურაცხყოფის აკრძალვის შესახებ კანონპროექტი განიხილეს. საკანონმდებლო ინიციატივის ავტორები საქართველოს პატრიოტთა ალიანსის წევრი, ემზარ კვიციანი და ჰომოფობიური და ქსენოფობიური შინაარსის მქონე საქართველოს დემოგრაფიული საზოგადოება 21-ის ხელმძღვანელი ზვიად ტომარაძე არიან.

კანონპროექტის მიხედვით, რელიგიური გრძნობების შეურაცხყოფა დასჯადი იქნება და სამართალდამრღვევს სასჯელის სახით დაეკისრება ფულადი ჯარიმა ან თავისუფლების აღკვეთა.

კანონპროექტის ინიციატორის ემზარ კვიციანის თქმით, კანონპროექტის მიღების მიზეზი საქართველოში ბოლო პერიოდში გახშირებული მოქალაქეთა რელიგიური გრძნობების, არსებული რელიგიების და წმინდანების შეურაცხყოფაა.

"რამდენიმე წელია "სიტყვისა და გამოხატვის თავისუფლების" საბაბით პერიოდულად ხდება ფარული თუ პირდაპირი შეურაცხყოფა, როგორც საქართველოს მართლმადიდებლური ეკლესიის, ასევე ქვეყანაში არსებული სხვადასხვა ტრადიციული რელიგიის მიმართ", - განაცხადა ემზარ კვიციანმა ინიციატივის წარდგენისას კომიტეტზე.

კანონპროექტის მიღების შემთხვევაში, რელიგიური სიწმინდეების, რელიგიური ორგანიზაციის, ღვთისმსახურის და მორწმუნის მიმართ სიძულვილის საჯაროდ გამოხატვა ან/და ისეთი მასალის
გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას დაისჯება ჯარიმით, ან თავისუფლების აღკვეთით ვადით 1 წლამდე.

რელიგიური შენობების და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება ან დაზიანება კი ორ წლამდე თავისუფლების აღკვეთით დაისჯება.

ემზარ კვიციანმა ხაზი გაუსვა, რომ კანონპროექტი სასულიერო პირების ქადაგებებზე არ უნდა გავრცელდეს.

ადამიანის უფლებათა კომიტეტის თავმჯდომარე სოფიო კილაძის ინიციატივაა, რომ შეიქმნას სამუშაო ჯგუფი, რომელიც კანონპროექტის დახვეწაზე იმუშავებს

"პრინციპების დონეზე მხარს ვუჭერთ, მაგრამ არაკონსტიტუციური კანონის მიღებას ჯობია კონსტიტუციური კანონი მივიღოთ", - განაცხადა სოფიო კილაძემ.

ზვიად ტომარაძის ავტორობით რელიგიური გრძნობების შეურაცხყოფაზე კანონპროექტი პარლამენტში უკვე მეორედ განიხილეს. პირველად 2016 წელს, მაშინ რელიგიური გრძნობების შეურაცხყოფა მხოლოდ ადმინისტრაციულ სამართალდარღვევასა და შესაბამისად, ჯარიმას ითვალისწინებდა. მაშინ კომიტეტმა წარმოდგენილ ინიციატივას მხარი არ დაუჭირა და კანონპროექტის დახვეწის რეკომენდაციით მიმართა.