"რუსეთსა და ჩინეთს შორის ურთიერთობები ურყევი და ძლიერია, პეკინი მხარს უჭერს მოსკოვს", — ამის შესახებ ჩინეთის საგარეო საქმეთა მინისტრმა ვანგ იმ რუსულ მედიასთან ინტერვიუში თქვა.

"ჩინეთ-რუსეთის ყოვლისმომცველი კოორდინაციის სტრატეგიულმა პარტნიორობამ გაუძლო საერთაშორისო ტურბულენტობის გამოცდას, დგას დროის ავანგარდში და ისეთივე ურყევი და ძლიერია, როგორც მთა ტაიშანი. ჩვენ სრულად გვესმის და მხარს ვუჭერთ რუსეთს, რომელიც იცავს თავის ლეგიტიმურ უფლებებსა და ინტერესებს დიპლომატიური საშუალებებით. ადამიანთა ერთობებს აქვთ საერთო ბედი და დიდი სახელმწიფოები უნდა მიჰყვნენ ისტორიის კარნახს მოვალეობის გრძნობით, რომ მეტი წვლილი შეიტანონ კაცობრიობის კეთილდღეობაში", — თქვა მან.

ვანგ ი საგარეო საქმეთა მინისტრის სერგეი ლავროვის მიწვევით 31 მარტს ჩავიდა რუსეთში ოფიციალური ვიზიტით, სადაც 2 აპრილამდე დარჩება. როგორც რუსული მედია წერს, მხარეები განიხილავენ მაღალი დონის კონტაქტებს, ორ სახელმწიფოს შორის ურთიერთობების განვითარებას და საერთაშორისო საკითხებს, მათ შორის უკრაინას.

კრემლის პრესსპიკერმა დიმიტრი პესკოვმა განაცხადა, რომ რუსეთის პრეზიდენტი ვლადიმერ პუტინი ჩინელ მინისტრს, შესაძლოა, უახლოეს დღეებში შეხვდეს.