პოლიციამ აქციიდან მომავალი 2 მოქალაქე სპორტის სასახლესთან დააკავა. დაკავებული არიან თბილისის სახელმწიფო უნივერსიტეტის ლექტორი გიორგი წოწკოლაური და სანდრო ლიპარტელიანი.

თეონა მატარაძემ, რომელიც გიორგი წოწკოლაურთან და სანდრო ლიპარტელიანთან ერთად დაკავებამდე ტაქსით მგზავრობდა, ფორმულასთან საუბრისას განაცხადა, რომ მან დაინახა "2-3 კაცი, რომელიც შკოდიდან გადმოხტა და [გიორგის და სანდროს] აეკიდნენ".

"რესპუბლიკის მოედანზე ვიყავით ერთად, გამოვიძახეთ ტაქსი, ჩავსხედით სამივე და სპორტის სასახლესთან, ცოტა წინ, სადაც ცხოვრობს გიორგი გავაჩერეთ, ჩამოვიდნენ [გიორგი და სანდრო] და როცა უკვე დაიძრა ტაქსი, რეფლექსურად, უკან მივიხედე და დავინახე, რომ შკოდიდან რამდენიმე, 2 თუ 3 კაცი გადმოხტა და აეკიდნენ, დავურეკე მაშინვე, რა ხდება მეთქი და მითხრეს, უკვე სპარში ვართ, ნუ გეშინია, გაგვჩხრიკეს, ჩანთა და ჯიბეები შეგვიმოწმეს, თუმცა ხელი არ ჩაუყვიათ ჯიბეში, მშვიდად იყავი, ავდივართ სახლშიო. არ ვიცი, ჩემს დასამშვიდებლად თქვეს ეს თუ რა, მაგრამ ამის მერე უკვე კონტაქტი აღარ მქონია, ვნახე [გიორგის] ლაივი, განყოფილებაში გადავყავართო" , — განაცხადა თეონა მატარაძემ.

გიორგი წოწკოლაურმა ადგილზე Facebook-ის LIVE ჩართო, რომელშიც ამბობს: "გაგვაჩერეს სპორტის სასახლესთან და გადავყავართ ქალაქის სამმართველოში, ოღონდ, არ გვეუბნებიან რის საფუძველზეა ეს ამბავი", რაზეც პოლიციელმა უპასუხა, რომ მისი დაკავება “იდენტიფიცირების მოხდენის მიზნითაა”.