რუსეთის პრეზიდენტის პრეს-სპიკერმა, მარია ზახაროვამ არც დაადასტურა და არც უარყო ინფორმაცია იმის შესახებ, რომ ოცნების მიერ არჩეული პრეზიდენტი მიხეილ ყაველაშვილი 9 მაისს აღლუმზე დასასწრებად მოსკოვშია მიწვეული.

Sova-ს ჟურნალისტის კითხვაზე ზახაროვამ ჟურნალისტი რუსეთის პრეზიდენტის ადმინისტრაციასთან გადაამისამართა. თუმცა დაამატა, რომ ისინი ჯერ არ აკეთებენ ამ საკითხზე კომენტარს და პროცედურაც განმარტა:

"ჯერ იღებენ გადაწყვეტილებას, შემდეგ აგზავნიან და მიღების შემდეგ აქვეყნებენ ინფორმაციას", — თქვა ზახაროვამ.

ნაციონალური მოძრაობის წევრმა, ლევან სანიკიძემ 30 მარტს სოციალურ ქსელში "სანდო წყაროზე დაყრდნობით" გაავრცელა ინფორმაცია იმის შესახებ, რომ "2025 წლის 9 მაისს ე.წ. პრეზიდენტი მიხეილ ყაველაშვილი მოსკოვში ჩასვლას და სამხედრო აღლუმზე პუტინის გვერდით დგომას აპირებს".

მისივე თქმით, სანაცვლოდ, ქოცებმა ამ ერთ თვეში

"უნდა გააუქმონ ნაციონალური მოძრაობა (ეს მინიმუმ), სამუდამო სასჯელი უნდა მიიღოს მიხეილ სააკაშვილმა, უნდა "ვაღიაროთ" 2008 წლის ომის დანაშაული, ბოდიში უნდა მოვუხადოთ ანწუხელიძის მკვლელებს.

ახალი საპროტესტო ტალღის უახლოესი ამოცანა ამ ღალატის ჩაშლა უნდა გახდეს!

იმედი მაქვს ხვალ სცენაზე მოვისმენ სალომე ზურაბიშვილის პოზიციის ცვლილებას 2008 წლის ომზე და განვითარებულ სიტუაციაზე, თუ არადა, ჩემთვის საქმე სხვანაირად იქნება.

სახელმწიფო ხომ დაკარგული გვაქვს, ახლა ქვეყანასაც ვკარგავთ!", — წერს სანიკიძე.

აღსანიშნავია, რომ ყაველაშვილის ადმინისტრაცია უარყოფს ინფორმაციას იმის შესახებ, რომ მიხეილ ყაველაშვილი 9 მაისს მოსკოვში გეგმავს წასვლას.

ცნობილია არასრული სია იმ ლიდერებისა, ვინც 2025 წლის 9 მაისს პუტინის გვერდით იქნებიან. ტვ პირველის ცნობით, კრემლის სტუმრებს შორის იქნებიან: ბელორუსისა და სერბეთის პრეზიდენტები, სლოვაკეთის პრემიერმინისტრი, ჩინეთში ხელისუფლების წარმომადგენელი და ბრაზილიის, ინდონეზიისა და პალესტინის ლიდერები.