საქართველოს პარლამენტი რელიგიური გრძნობების შეურაცხყოფაზე კანონპროექტს განიხილავს. 24 აპრილს პარლამენტის ადამიანის უფლებათა კომიტეტის სხდომაზე განიხილეს კანონპროექტი, რომლის ინიციატორიც პატრიოტთა ალიანსის დეპუტატი ემზარ კვიციანია.

საპარლამენტო უმრავლესობის დეპუტატები ინიციატივას პრინციპულ დონეზე დაეთანხმნენ, თუმცა შენიშვნები შეიტანეს და კანონპროექტის დახვეწის მიზნით, სამუშაო ჯგუფის შექმნა დაანონსეს.

On.ge დაინტერესდა, რას ფიქრობენ საქართველოში არსებული რელიგიური კონფესიების წარმომადგენლები რელიგიური გრძნობების შეურაცხყოფის აკრძალვის ინიციატივაზე.

პატრიოტთა ალიანსის ინიციატივას იმ რელიგიური ორგანიზაციებიდან, რომელსაც On.ge ესაუბრა, მხოლოდ მართლმადიდებელი ეკლესია ეთანხმება და ისიც ნაწილობრივ.

საქართველოს მართლმადიდებელი ეკლესია

პროტოპრესვიტერმა გიორგი ზვიადაძემ On.ge-ს განუცხადა, რომ საქართველოს საპატრიარქო ეთანხმება რელიგიური გრძნობების შეურაცხყოფის აკრძალვის შესახებ გაკვეული მექანიზმის შექმნას, ისე რომ გამოხატვის თავისუფლება არ შეიზღუდოს.

ფოტო: კადრი ვიდეოდან / ინტერVIEW

"საჭიროა, საზოგადოებამ ამ საკითხზე იმსჯელოს. საჭიროა, საერთო გადაწყვეტილებამდე მისვლა. ერთი მხრივ, გამოხატვის თავისუფლების შეზღუდვა დაუშვებელია. ეს არ შეიძლება და საპატრიარქოს ძალიან კარგად ესმის. მეორე მხრივ, რელიგიურ გრძნობებს ხშირად შეურაცხყოფენ. საპატრიარქოს მიაჩნია, რომ სხვისი რელიგიური გრძნობების შეურაცხყოფა დაუშვებელია. ეს არა მხოლოდ მართლმადიდებლობას, არამედ ყველა აღმსარებლობას უკავშირდება", - ამბობს მამა გიორგი ზვიადაძე.

პროტოპრესვიტერის თქმით, არსებობს პრეცედენტები, როცა რელიგიური გრძნობების შეურაცხყოფა დაპირისპირებისა და შფოთის შემოტანის მიზეზი გახდა.

"საქართველო უდიდესი ცივილიზაციისა და კულტურის ქვეყანაა. იმ ქვეყანაში, რომელსაც უდიდესი მართლმადიდებლური კულტურა ამშვენებს და უდიდესი ღირსების მქონეა, დაუშვებელია, რომელიმე პიროვნება სხვისი რელიგიური გრძნობების შეურაცხყოფას ცდილობდეს", - განაცხადა მამა გიორგი ზვიადაძე.

ის არ იზიარებს პოზიციას, რომ რელიგიური გრძნობების შეურაცხყოფისთვის ადამიანები პასუხისგებაში უნდა მიეცენ, თუმცა კონტროლის საჭიროებას ხედავს.

"უნდა მომზადდეს გარკვეული მექანიზმი, რათა, ერთი მხრივ, დაცული იყოს გამოხატვის თავისუფლება და მეორე მხრივ, არ მოხდეს სხვათა რელიგიური გრძნობების შეურაცხყოფა. საპატრიარქოს პოზიცია არ არის, რომ ვინმე ციხეში უნდა წავიდეს. საჭიროა მსჯელობა, როგორ გავავლოთ მკვეთრი ზღვარი გამოხატვის თავისუფლებასა და რელიგიური გრძნობების შეურაცხყოფას შორის", - უთხრა On.ge-ს პროტოპრესვიტერმა.

მუსლიმი თემი

ქართველ მუსლიმთა კავშირის თავმჯდომარე რელიგიური გრძნობების დაცვის შესახებ კანონის შექმნის ინიციატივას არ ეთანხმება.

"თემა, რომელიც ეხება რელიგიურ გრძნობებს სუბიექტურია და თუ კანონად იქცევა რელიგიათა შორის ურთიერთობების დაძაბვის საფუძველი გახდება. ყველა რელიგიურ დოგმატიკას, ამა თუ იმ საკითხთან მიმართებით, თავისებური მიდგომა აქვს, რომელიც შესაძლებელია სხვა რელიგიამ შეურაცხყოფად ჩათვალოს", - უთხრა On.ge-ს ალექსანდრე ნაკაიძემ.

ფოტო: Facebook / Tariel Nakaidze

ის ფიქრობს, რომ მსგავსი კანონები ქვეყნის განვითარებასა და რელიგიათა შორის ურთიერთობებს დააბრკოლებს.

ტარიელ ნაკაიძის აზრით, რელიგიური გრძნობები სუბიექტურია. მას მიაჩნია, რომ ინიციატივის მიზანი სასულიერო პირების მიმართ კრიტიკის პრევენციაა.

"სასულიერო პირები და შუამავლები, ვინც ამ რელიგიებს აყალიბებდნენ ყველაზე დიდი კრიტიკის და შეურაცხყოფის მსხვერპლები იყვნენ. სასულიერო პირები უნდა იყვნენ ამისთვის მზად და სულიერო მოთმინების საშუალებაც უნდა ჰქონდეს", - ამბობს ტარიელ ნაკაიძე.

ქართველ მუსლიმთა კავშირის თავმჯდომარის თქმით, პარლამენტში სამუშაო ჯგუფის მუშაობაში არ ჩაერთვება.

სომეხთა სამოციქულო ეკლესია

On.ge-ს სომეხთა სამოციქულო ეკლესიაში განუცხადეს, რომ მათ რელიგიური გრძნობების დაცვის შესახებ კანონპროექტზე ჯერჯერობით პოზიცია არ აქვთ და კომენტარს მას შემდეგ გააკეთებენ, რაც ინიციატივა დაიხვეწება და მისი შინაარსი უფრო ნათელი და გასაგები გახდება.

ევანგელურ-ბაპტისტური ეკლესია

ევანგელურ-ბაპტისტური ეკლესიის ეპისკოპოსი რუსუდან გოცირიძე იზიარებს მუსლიმი თემის პოზიციას და ფიქრობს, რომ რელიგიური გრძნობების შეურაცხყოფის შესახებ ინიციატივა საზოგადოებას მძიმე ტვირთად დააწვება.

ფოტო: ფოტო ვიდეოდან / საუბრები რელიგიაზე

"ეს იქნება, როგორც მედიის, ისე ხელოვნების სფეროში და პოლიტიკური ოპონენტების მოსაშორებლად იოლად გამოსაყენებელი ინსტრუმენტი. როგორ წვრილადაც უნდა იყოს გაწერილი მუხლები, გრძნობებს კანონის ფარგლებში ვერავინ ვერ ჩასვამს და ყოველთვის იქნება მანიპულაციის საფრთხე", - უთხრა On.ge-ს რუსუდან გოცირიძემ.

მისი თქმით, საერთაშორისო გამოცდილება არსებობს, რომელმაც აჩვენა, რომ რელიგიური გრძნობების დაცვის შესახებ კანონი არ ამართლებს.

"ეს კანონი გამოიყენება ძალაუფლების მქონე ინსტიტუციების მიერ მათი ოპონენტებისა და უფრო სუსტი და მარგინალიზებული ჯგუფების წინააღმდეგ" - ამბობს რუსუდან გოცირიძე.

კანონპროექტი რელიგიური გრძნობების შეურაცხყოფაზე

კანონპროექტის წარმოდგენილი ვერსიით მიღების შემთხვევაში, რელიგიური სიწმინდეების, რელიგიური ორგანიზაციის, ღვთისმსახურის და მორწმუნის მიმართ სიძულვილის საჯაროდ გამოხატვა ან/და ისეთი მასალის გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას დაისჯება ჯარიმით, ან თავისუფლების აღკვეთით ვადით 1 წლამდე.

რელიგიური შენობების და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება ან დაზიანება კი ორ წლამდე თავისუფლების აღკვეთით დაისჯება.

გაიგე მეტი: