ანტარქტიდაში მყინვარიდან ჩიკაგოს ზომის გიგანტური აისბერგი მოწყდა. ამ მოვლენის შედეგად მეცნიერებმა აქამდე უცნობი ეკოსისტემა აღმოაჩინეს. ისინი ამ რეგიონში გემზე 2025 წლის დასაწყისიდან იყვნენ, შესაბამისად, აისბერგის მოწყვეტის ადგილს, რომელიც ჯორჯ IV-ის სახელობის მყინვართან ახლოსაა, სწრაფადვე მიაშურეს.

მეცნიერების საერთაშორისო ჯგუფმა აისბერგის ადგილას დისტანციურად მართვადი ტრანსპორტი სახელად SuBastian ჩაუშვა. მან ადამიანისთვის ჯერ არნახული ეკოსისტემა აღმოაჩინა. ის შედგებოდა ღრუბელებისგან, ზღვის ანემონებისგან, ჰიდროიდებისა და მარჯნისგან.

"ჩვენ მომენტით ვისარგებლეთ, შევცვალეთ ექსპედიციის გეგმა და ზღვის სიღრმეების შესასწავლად დაუყოვნებლივ გავეშურეთ", — იხსენებს ექსპედიციის თანახელმძღვანელი მეცნიერი პატრისია ესკეტი — "არ ველოდით, რომ ასეთ ლამაზ და აყვავებულ ეკოსისტემას აღმოვაჩენდით".

მკვლევრებს ამ ეტაპზე ანტარქტიდის ზღვის ფსკერზე მობინადრე სახეობების შესახებ ძალიან მცირე ინფორმაცია აქვთ. მიიჩნევა, რომ მზის შუქისა და საკვები ნივთიერებების გარეშე ასეთ სიღრმეზე არსებული ეკოსისტემები მთლიანად ოკეანის დინებებზეა დამოკიდებული.

მეცნიერებს, სავარაუდოდ, წლები დასჭირდებათ, რათა ყველა ის ახალი სახეობა აღწერონ, რომელიც ამ უნიკალურ საცხოვრებელ გარემოში და მის გარშემო, ბელინგსჰაუზენის ზღვაში აღმოაჩინეს. მკვლევრებისთვის ჯერ კიდევ გაუგებარია, 150 კილომეტრის სისქის ყინულის საფარის ქვეშ სიცოცხლე როგორ არსებობს.

"ცხოველების ზომის მიხედვით თუ ვიმსჯელებთ, ჩვენ მიერ დაკვირვებული ერთობები იქ ათწლეულებია, შესაძლოა, ასწლეულებიც კი ბინადრობს", — ამბობს ესკეტი — "აი, მაგალითად, დიდი ღრუბელა. ისინი ხშირად წელიწადში მხოლოდ რამდენიმე სანტიმეტრით იზრდება. ეს იმას ნიშნავს, რომ ეს ინდივიდი აქ შესაძლოა, ათწლეულების ან თუნდაც საუკუნეების განმავლობაში არსებობდეს. ის 230 მეტრის სიღრმეში ბინადრობს და ცოტა ხნის წინ, დიდი ყინულის გამო, დანარჩენი სამყაროსგან სრულად იზოლირებული იყო".

SuBastian რამდენიმე დღის განმავლობაში მუშაობდა. მან ზღვის ფსკერის ეკოსისტემა გამოიკვლია, რეგიონი რუკაზე დაიტანა და შემდგომი ანალიზისთვის ნალექის მრავალი ნიმუში შეაგროვა. ალექსანდრ მონტელი, რომელიც ლონდონის უნივერსიტეტის კოლეჯიდანაა და ექსპედიციაში მონაწილეობდა, ამბობს, რომ ეს პირველი შემთხვევაა, როდესაც "მსგავსი კომპლექსური კვლევა მყინვარების ქვეშ არსებულ გარემოში ჩატარდა".

მოტივტივე მყინვარების ქვეშ დისტანციურად მართვადი აპარატების გაშვება რთული ამოცანაა. არსებული ნავიგაციური სისტემები ყინულის სისქიდან გამომდინარე იძულებულია, GPS-ის ნაცვლად, აკუსტიკურ მოწყობილობებს დაეყრდნოს. ექსტრემალური წნევები და ტემპერატურები კიდევ უფრო ართულებს ამ პროცესს.

"მეცნიერების ჯგუფი თავდაპირველად ამ მოშორებულ რეგიონში ზღვის ფსკერისა და ეკოსისტემის შესასწავლად იყო წასული", — ამბობს შმიდტ ოუშენ ინსტიტუტის აღმასრულებელი დირექტორი, იოტიკა ვირმანი — "ამ აისბერგის მოწყვეტისას იქ ყოფნა იშვიათი სამეცნიერო შესაძლებლობა იყო. შემთხვევითი მომენტები ზღვის კვლევის ნაწილია. ისინი შანსს გვაძლევს, ვიყოთ პირველი, ვინც ჩვენი სამყაროს ხელუხლებელ სილამაზეს იხილავს".

ბელინგსჰაუზენის ზღვასთან ახლოს მდებარე რეგიონი მკვლევართა იგივე ჯგუფმა წლების წინ გამოიკვლია. მათ მარჯნები, თევზები, კიბორჩხალები, ზღვის გიგანტური ობობები, მედუზები და რვაფეხები აღმოაჩინეს. ეს მიუთითებს, რომ როდესაც მოტივტივე ყინული ზღვის ფსკერს შორდება, ახალი სიცოცხლე სწრაფად იწყებს განვითარებას.