"მოქალაქეთა პოლიტიკური გაერთიანებების შესახებ" კანონში დაგეგმილი ცვლილებების მიხედვით, საკონსტიტუციო სასამართლოს შეეძლება აკრძალოს პარტია, რომლის გაცხადებული მიზანი, საქმიანობის არსი — მათ შორის პერსონალური შემადგენლობა სასამართლოს მიერ უკვე აკრძალული პარტიის გაცხადებულ მიზანს, საქმიანობის არსსა და პერსონალურ შემადგენლობას იმეორებს.

კანონში ცვლილება პარლამენტში ქართულმა ოცნებამ წარადგინა.

საქართველოს კანონმდებლობით, პარტიის აკრძალვა მხოლოდ საკონსტიტუციო სასამართლოს გადაწყვეტილებით შეიძლება.

"მოქალაქეთა პოლიტიკური გაერთიანებების შესახებ" მოქმედი კანონის გათვალისწინებით, საკონსტიტუციო სასამართლოს შეუძლია აკრძალოს პარტია, რომლის მიზანია:

  • საქართველოს კონსტიტუციური წყობილების დამხობა ან ძალადობით შეცვლა,
  • ქვეყნის დამოუკიდებლობის ხელყოფა,
  • ტერიტორიული მთლიანობის დარღვევა,
  • ან რომელიც ეწევა ომის ან ძალადობის პროპაგანდას,
  • აღვივებს ეროვნულ, კუთხურ, რელიგიურ ან სოციალურ შუღლს,
  • ქმნის ან შექმნილი აქვს შეიარაღებული ფორმირება.

  • საკონსტიტუციო სასამართლოს ასევე შეუძლია, აკრძალოს პარტია, რომელიც უკვე აკრძალული პარტიის იდენტური იქნება თავისი შემადგენლობით, მიზნითა და საქმიანობის არსით.

პარტიის საქმიანობა ასევე შეიძლება რეორგანიზაციის ან თვითლიკვიდაციის საფუძველზე შეწყდეს.

პარტიის აკრძალვის ან თვითლიკვიდაციის შემდეგ დარჩენილი ქონება სახელმწიფო ხაზინას გადაეცემა.

საკონსტიტუციო სასამართლოს შესახებ კანონში შესატანი ცვლილებით, სასამართლომ გადაწყვეტილება სარჩელის შეტანიდან არაუმეტეს 9 თვეში უნდა მიიღოს, ხოლო საარჩევნო პერიოდში – 14 დღეში.

შეგახსენებთ, რომ ოპოზიციური პარტიების, კერძოდ ნაცმოძრაობის აკრძალვა, ქართული ოცნების წინასაარჩევნო დაპირება იყო. ამის შესახებ საარჩევნო კამპანიის დროს ჯერ კიდევ ბიძინა ივანიშვილმა გააჟღერა. ის ამომრჩეველს ნიურბერგის პროცესს და ნაცმოძრაობის გასამართლებას ჰპირდებოდა. ამის შემდეგ დაპირების სისრულეში მოყვანას შეუდგა ოცნება.

27 მარტს ოცნების აღმასრულებელმა მდივანმა, მამუკა მდინარაძემ განაცხადა, რომ ენმ-ს ხელისუფლების საქმიანობის შემსწავლელი საგამოძიებო კომისიის საბოლოო დასკვნა ქართულ ოცნებას საფუძველს მისცემს, რომ საკონსტიტუციო სასამართლოს მიმართონ და მოითხოვოს როგორც ენმ-ის, ისე სხვა ოპოზიციური პარტიების არაკონსტიტუციურად გამოცხადება.