დღეს, ენმ-ს ხელისუფლების საქმიანობის შემსწავლელ კომისიაში 2008 წლის ომს განიხილავდნენ. კომისიის მდივან სოზარ სუბარის თქმით, არსებობს ინფორმაცია, რომ იარაღის ნაწილი, რომელიც საქართველოში შემოვიდა, გამოუსადეგარი იყო საბრძოლო მოქმედებებისთვის, რაზეც გაერთიანებული შტაბის ყოფილმა უფროსმა, გენერალმა ზაზა გოგავამ უპასუხა, რომ ეს არის "ძალიან ცუდი ბრალდება".

"ძალიან ცუდი ბრალდებაა, მეორედ არ გაიმეოროთ! არასწორი ბრალდებაა ნებისმიერ სამხედროსთან! მომიყვანეთ ნებისმიერი სამხედრო, დამელაპარაკოს, რა არ ვარგოდა, რა ეჭირათ და რით დაამთავრეს ომი?! ასე არ შეიძლება ადამიანის ამოთხვრა ტალახში, ზოგიერთმა თავისი დეზერტირობა და მაიმუნობა რომ დამალოს!", — განაცხადა გოგავამ.

მისივე თქმით, ქართველ ჯარისკაცებს ცხინვალი არ დაუბომბიათ. კითხვაზე, იყო თუ არა შესაძლებელი აგვისტოს ომის თავიდან აცილება, უპასუხა — "გამორიცხული იყო".

"გამორიცხული იყო [ომის თავიდან აცილება] და ეს დაამტკიცა მათი სამკლავურების შეცვლამ. მათი მიზანი თბილისი იყო და რაც შეიძლება ადვილად გაეკეთებინათ ეს", — აღნიშნა მან.