ოცნების პარლამენტის თავმჯდომარე შალვა პაპუაშვილი მარინ ლე პენის გასამართლებას ეხმიანება და წერს, რომ არ უნდა საფრანგეთის შიდა საქმეებში ჩარევა, თუმცა მისი თქმით, ნურც საფრანგეთი ჩაერევა საქართველოს შიდა საქმეებში.

"მე, რა თქმა უნდა, არ მინდა საფრანგეთის შიდა საქმეებში ჩავერიო, მაგრამ, მაშინ, ნურც საფრანგეთი ჩაერევა საქართველოს შიდა საქმეებში. აქ დაბალი ღობე არავინაა", — წერს პაპუაშვილი.

პარიზის სასამართლომ მარინ ლე პენი და მისი პარტიის 24 წევრი, მათ შორის 9 ყოფილი ევროპარლამენტარი და მათი 12 საპარლამენტო ასისტენტი დამნაშავედ ცნო — მათ ბრალად ედებოდათ ევროპის პარლამენტის მიერ გამოყოფილი საბიუჯეტო თანხების გაფლანგვა.

მარინ ლე პენს სასამართლომ 2027 წელს საფრანგეთის საპრეზიდენტო არჩევნებში მონაწილეობა აუკრძალა და 4 წლით თავისუფლების აღკვეთა მიუსაჯა. აქედან 2 წელი პირობითი სასჯელი აქვს, 2 წელი — ელექტროსამაჯური უნდა ატაროს. ამას გარდა, ლე პენს 100 000-ევროიანი ჯარიმა დაეკისრა.