მიხეილ სააკაშვილის პირადი ექიმის, ნიკოლოზ ყიფშიძის განცხადებით, ექსპრეზიდენტის თანხმობის შემთხვევაში მას საავადმყოფოში გადაიყვანენ. ეს განცხადება მან ექიმთა კონსილიუმისა და მინისტრებთან შეხვედრის შემდეგ გააკეთა.

"გავიარეთ ჩვენ კონსილიუმის დოკუმენტები და შევთანხმდით. ყველა ერთ ტალღაზე ვართ — პრევენციული ჰოსპიტალიზაცია [...] გადაწყვეტილი არ არის, იმიტომ, რომ ჯერ ავადმყოფი უნდა დათანხმდეს მაგაზე", — განაცხადა ნიკოლოზ ყიფშიძემ.

მისი თქმით, რუსთავის ციხეში ექსპრეზიდენტის მონახულებას ხვალ დილით გეგმავს და გაარკვევს, დათანხმდება თუ არა სააკაშვილი კლინიკაში გადაყვანას. მისი თანხმობის შემთხვევაში ჰოსპიტალიზაციის სავარაუდო თარიღად ყიფშიძემ შაბათი ან კვირა დაასახელა. ექიმს არ დაუკონკრეტებია რომელ კლინიკაში იგეგმება ექსპრეზიდენტის გადაყვანა.

რაც შეეხება სააკაშვილის ჯანმრთელობის მდგომარეობას, პირადი ექიმის განცხადებით, მისი მდგომარეობა სტაბილურია.

ყიფშიძის ინფორმაციით, შეხვედრას სააკაშვილის ჯანმრთელობის მონიტორინგისთვის შექმნილი ექიმთა კონსილიუმის წევრები, ჯანდაცვისა და იუსტიციის მინისტრები და ჯანდაცვის კომიტეტის თავმჯდომარე, დიმიტრი ხუნდაძე ესწრებოდნენ. ასევე, სახალხო დამცველი, ნინო ლომჯარია.

ჯანდაცვის სამინისტროს ბაზაზე შექმნილი ექიმთა მულტიფუნქციური ჯგუფის წევრებმა მიხეილ სააკაშვილი დღეს პირველად მოინახულეს. რუსთავის ციხიდან გამოსვლის შემდეგ, კარდიოლოგმა, ზურაბ ფაღავამ განაცხადა, რომ კონსილიუმი ექსპრეზიდენტის პრევენციული ჰოსპიტალიზაციის რეკომენდაციას გასცემს.

მიხეილ სააკაშვილის ადვოკატმა, დიმიტრი საძაგლიშვილმა დღეს განაცხადა, რომ აუცილებლობის შემთხვევაში, ექსპრეზიდენტი კლინიკაში გადაყვანის წინააღმდეგი არ იქნება.

გაიგე მეტი: