საქართველოში აშშ-ის საელჩოს ინფორმაციით, აშშ-ის თავდაცვის საფრთხის შემცირების სააგენტომ (DTRA) და ქართველმა პარტნიორებმა ჩაატარეს საველე-პრაქტიკული სწავლება „NEXUS Georgia 2026“, რომლის მიზანიც იყო საქართველოს შესაძლებლობების გაძლიერება ქიმიურ და ბიოლოგიურ საგანგებო სიტუაციებზე რეაგირების კუთხით.

როგორც საელჩო იტყობინება, სწავლების ფარგლებში, საქართველოს სახელმწიფო უწყებებმა პრაქტიკაში გამოცადეს კოორდინირებული მუშაობა სიმულირებულ საგანგებო სიტუაციებში.

"სცენარები მოიცავდა საქართველოს ტერიტორიულ წყლებში შემომავალ გემზე ბიოლოგიურ და ქიმიურ საფრთხეებთან დაკავშირებულ ინციდენტებს, ასევე, ხალხმრავალ კონცერტზე ქიმიური ნივთიერებებისა და ასაფეთქებელი მოწყობილობის გამოყენებასთან დაკავშირებულ ინციდენტს.
„NEXUS Georgia 2026“-ის მსგავსი სწავლებებით, შეერთებული შტატები და საქართველო განაგრძობენ თანამშრომლობისა და მზადყოფნის გაძლიერებას, რათა ეფექტიანად უპასუხონ კომპლექსურ საგანგებო სიტუაციებს და დაიცვან ადამიანების უსაფრთხოება", — წერია საელჩოს მიერ გავრცელებულ ინფორმაციაში.