ოცნების დეპუტატი ირაკლი ზარქუა, გაფართოების საკითხებში ევროკომისარ მარტა კოსის განცხადებას ეხმაურება იმის შესახებ, რომ კანდიდატმა ქვეყნებმა MAGA-სგან დისტანცირება უნდა მოახდინონ. ზარქუა აცხადებს, რომ "ევროკავშირის ბიუროკრატია ყველაფერს ასცდა. ჩვეულებრივად, საბჭოთა კავშირს დაემსგავსა".

"ევროკავშირის ბიუროკრატია ყველაფერს ასცდა. ჩვეულებრივად, საბჭოთა კავშირს დაემსგავსა — თავიანთი დამოკიდებულებით, ხისტი პოლიტიკით, ხელების გადაგრეხით. ე.ი. თვითონ კარნახობენ, ვისთან უნდა ისაუბრო, ვისთან უნდა გქონდეს ბიზნესაქტიურობები — ამერიკის შეერთებულ შტატებთან, ჩრდილოეთთან, სამხრეთთან არ უნდა ითანამშრომლო. მარტო იმათთან უნდა ითანამშრომლო, ვინც აქ რევოლუციას გვიწყობს. წარმოიდგინეთ, კუბილიუსები, ანა ფოტიგები, რაისა "კომუნისტკები" და მარტა კოსები — ეს საბჭოთა კავშირის ნომენკლატურა არის დღეს ევროკავშირის ხელმძღვანელობაში და ამ საბჭოთა კავშირის ნომენკლატურამ უნდა დაგვიწესოს ჩვენ, როგორ ვიცხოვროთ და როგორ ვისუნთქოთ. ამაზრზენია, მიუღებელია", — განაცხადა ზარქუამ (IPN).

შეგახსენებთ, რომ ევროკომისარმა გაფართოების საკითხებში, მარტა კოსმა, ევროპის პოლიტიკურ კვლევათა ცენტრის მიერ ორგანიზებულ ღონისძიებაზე განაცხადა, რომ ევროკავშირში გაწევრიანების კანდიდატმა ქვეყნებმა აშშ-ის პრეზიდენტ დონალდ ტრამპის მოძრაობა MAGA-სგან (Make America Great Again — "კვლავ დიდებული გავხადოთ ამერიკა") დისტანცირება უნდა მოახდინონ.