ლეიბორისტული პარტიის ლიდერი, შალვა ნათელაშვილი საპატრიარქოს მოუწოდებს დავით გარეჯთან დაკავშირებით "ხმა ამოიღონ". ნათელაშვილმა აღნიშნა, რომ ქრისტიანული კულტურის ძეგლი ბიძინა ივანიშვილმა საბოლოოდ გაყიდა. ნათელაშვილმა ასევე მოუწოდა აშშ-ს, ევროკავშირსა და დიდ ბრიტანეთს, რომ დაასრულონ ივანიშვილის დასანქცირება.

"სანამ ცნობისმოყვარეთა ჯგუფები არკვევენ დავით გარეჯის ბედს, სრულიად საქართველოს, სამწუხაროდ, მინდა ვაცნობო, რომ ეს მსოფლიო მნიშვნელობის ქართული, ქრისტიანული, 15-საუკუნოვანი კულტურის ძეგლი, ოლიგარქ-დიქტატორმა, ბიძინა ივანიშვილმა საბოლოოდ გაყიდა.

[...]

დგანან შეიარაღებული ძალები, უცხო ქვეყნის და იქ შესვლა თუ ვინმეს მოუნდა, აზერბაიჯანის სასაზღვრო სამსახურმა უნდა გასცეს ნებართვა, მეტი რაღაა ანექსია, ოკუპაცია, გაყიდვა, ღალატი, ერის გულში დანის ჩაცემა, რაც ბიძინა ივანიშვილმა გააკეთა. მოვუწოდებ აშშ-ის ხელისუფლებას, ევროკავშირს, დიდ ბრიტანეთს, დაამთავრეთ ივანიშვილის და მისი ბანდის დასანქცირება, სანამ სულ გაყიდის ამ ღვთივკურთხეულ მიწას და გადაეცით ის საერთაშორისო ტრიბუნალს. მოვუწოდებ საპატრიარქოს, ამოიღეთ ხმა, როდემდე უნდა იყოთ დადუმებული, აქ შაჰ-აბასის მიერ დახოცილი 6 ათასი ბერის სისხლი ზეცაში ღაღადებს, თქვენ კი თქვენი ბიზნესით ხართ დაკავებული," — განაცხადა ნათელაშვილმა.

შეგახსენებთ, სიკვდილამდე ცოტა ხნით ადრე, პოლიტიკურმა აქტივისტმა და უფლებადამცველმა ლაზარე ჯორბენაძემ გაზეთ "ასავალ-დასავალში" გამოაქვეყნა ინტერვიუ, სადაც ამტკიცებდა, რომ პრემიერმა ირაკლი კობახიძემ აზერბაიჯანის პრეზიდენტ ილჰამ ალიევთან საიდუმლო შეთანხმებას მოაწერა ხელი, რომლითაც აზერბაიჯანს დავით გარეჯის ტერიტორიის ნაწილი გადასცა და მას ამის დამადასტურებელი დოკუმენტი ჰქონდა. ხელისუფლების წარმომადგენლები აღნიშნულ ბრალდებებს უარყოფენ.

რაც შეეხება ლაზარე ჯორბენაძეს, ის 2026 წლის აპრილში გარდაიცვალა. საქმეზე თვითმკვლელობის ვერსია განიხილება, თუმცა მის ახლობლებს, თანაპარტიელებსა და საზოგადოების ნაწილს ამის არ სჯერათ და მიიჩნევენ, რომ გაურკვეველ ვითარებაში გარდაიცვალა.

ცნობისთვის, ექსპრემიერი ღარიბაშვილი 1-ელ სექტემბერს ციხიდან გამოქვეყნებულ რიგით მე-5 წერილში უფლებადამცველ ლაზარე ჯორბენაძის გარდაცვალების გარემოებების და რეალური მიზეზის გარკვევას ითხოვს.