ოკუპირებული აფხაზეთის ე.წ. ენერგეტიკის მინისტრი ბათალ მუშბა აცხადებს, რომ ამ დროისთვის ოკუპირებულ აფხაზეთში საწვავით მომარაგების მდგომარეობა სტაბილურად შეიძლება ჩაითვალოს. საწვავის მარაგები აქვთ როგორც საწვავის ბაზრის მსხვილ მოთამაშეებსა და დიდ ავტოგასამართ სადგურებს, ისე მცირე ავტოგასამართ სადგურებს. ინფორმაციას ე.წ. პრეზიდენტის, ბადრა გუნბას ე.წ. ადმინისტრაცია ტელეგრამზე ავრცელებს.

მათი ცნობით, ამჟამად ოკუპირებულ ტერიტორიაზე დაახლოებით 2 000 ტონა "აი"-92-ის მარკის ბენზინის, დაახლოებით 2 500 ტონა "აი"-95-ის მარკის ბენზინისა და დაახლოებით 3 700 ტონა დიზელის საწვავის მარაგია. გარდა ამისა, გზაშია დაახლოებით 2 000 ტონა ბენზინი, რომელიც, სავარაუდოდ, ადგილზე მომავალი კვირის ბოლომდე ჩავა.

ბათალ მუშბას განცხადებით, თუ გაუთვალისწინებელი გარემოებები არ შეიქმნა, მომდევნო ერთი თვის განმავლობაში აფხაზეთში დამატებით დაახლოებით 3 500 ტონა ბენზინისა და დაახლოებით 3 000 ტონა დიზელის საწვავის შემოტანაა მოსალოდნელი.

მისი თქმით, შექმნილ ვითარებაში კომერციულმა კომპანიებმა საწვავის მიწოდების ალტერნატიული გზების მოძიება შეძლეს. ამან შიდა ბაზარზე მდგომარეობის გაუმჯობესებას შეუწყო ხელი და მნიშვნელოვნად დაეხმარა აფხაზეთს საჭირო რაოდენობის საწვავის უზრუნველყოფაში.

ამასთან, ბათალ მუშბამ აღნიშნა, რომ შექმნილმა ვითარებამ საწვავის ფასებზეც იმოქმედა. მისი თქმით, ფასების ზრდა ობიექტურ მიზეზებს უკავშირდება, რომლებიც აფხაზეთზე არ არის დამოკიდებული.

მან ხაზი გაუსვა, რომ ის და მისი კოლეგები ყველაფერს აკეთებენ ბადრა გუნბას დავალების შესასრულებლად — არ დაუშვან ისეთი ვითარების განმეორება, როდესაც აფხაზეთი საწვავის დეფიციტის წინაშე აღმოჩნდება.

ე.წ. პრეზიდენტმა ბადრა გუნბამ აღნიშნა, რომ მიზეზები, რომლებიც მანამდე რუსეთიდან საწვავის მიწოდებას ართულებდა, ჯერ სრულად აღმოფხვრილი არ არის. შესაბამისად, აუცილებელია ალტერნატიული მარშრუტებით მიწოდებაზე მუშაობის გაგრძელება და უკვე გამართული მიწოდების არხების შენარჩუნება.

პრეზიდენტმა ასევე დაავალა, საჭიროების შემთხვევაში, დროულად ჩატარდეს მოლაპარაკებები რუს კოლეგებთან და მუდმივი კონტროლის ქვეშ იყოს აფხაზეთის ყველა ძირითადი სახეობის საწვავით და დიზელით მომარაგების საკითხი და აუცილებელი მარაგების შექმნა.

ოკუპირებულ აფხაზეთში საწვავის დეფიციტი აგვისტოს დასაწყისში გამწვავდა. ამის მიზეზი რუსეთში ნავთობგადამამუშავებელ საწარმოებზე უკრაინული დრონების თავდასხმები და საწვავის მიწოდებაზე შეფერხებები ი. შედეგად, აფხაზეთში ბენზინგასამართ სადგურებთან რიგები გაჩნდა და საწვავის გაყიდვაზე შეზღუდვები დაწესდა.

შეგახსენებთ, რომ საქართველოდან ოკუპირებულ აფხაზეთში საწვავის შეტანა 12 აგვისტოს დადასტურდა. საწვავი კერძო კომპანიამ, "სოლიდუსმა", შეიტანა. 18 აგვისტოს პრემიერმა კობახიძემ განაცხადა, რომ იმ დროისთვის საქართველოს კონტროლირებადი ტერიტორიიდან აფხაზეთში სულ დაახლოებით 680 ტონა საწვავი შევიდა.