პარლამენტის თავმჯდომარემ შალვა პაპუაშვილმა საქართველოში დემოგრაფიულ კლებასთან დაკავშირებით კომენტარი გააკეთა და აღნიშნა, რომ ეს მხოლოდ საქართველოს პრობლემა არ არის და მას მრავალი მიზეზი აქვს.

კერძოდ, პაპუაშვილის აზრით, საქართველოში შობადობის კლება კეთილდღეობის ზრდასთან არის დაკავშირებული და ამას მოსახლეობის მხრიდან კარიერის დაპრიორიტეტებით ხსნის. მისი განმარტებით, ეკონომიკურ და ფინანსურ ზრდას დემოგრაფიულ პრობლემასთან კავშირი არ აქვს და ეს "კულტურის საკითხია". მისი მტკიცებით, სტატისტიკა აჩვენებს, რომ საზოგადოებაში ქორწინების რაოდენობამ იკლო და სტატისტიკა პირველ და მეორე შვილზე დაბალია.

ამასთან, პარლამენტის თავმჯდომარემ მაგალითად მოიყვანა წინა ხელისუფლება, რომ მათ პირობებში საბავშვო ბაღები და უმაღლესი საგანმანათლებლო დაწესებულებები უფასო არ იყო და ამაზე მმართველმა პარტიამ იზრუნა. პაპუაშვილმა დემოგრაფიულ ზრდაზე ზრუნვის მაგალითად მოიყვანა პატრიარქის საყოველთაო ნათლობაც — მისი აზრით, საპატრიარქომ ამითაც წაახალისა შობადობის გაზრდა.

"დემოგრაფიული გამოწვევები არ არის მხოლოდ საქართველოს პრობლემა. ეს ზოგადი ტენდენციაა, მათ შორის ევროპაში, სადაც ეკონომიკური და კეთილდღეობის ზრდა ხდება. სამწუხაროდ, პირდაპირი კორელაცია არსებობს კეთილდღეობის ზრდასა და შობადობის კლებას შორის, ბევრი ფაქტორის გათვალისწინებით — ადამიანები ახლა უფრო მეტ ყურადღებას აქცევენ საკუთარ კარიერას. მსოფლიო რუკას რომ შეხედოთ, სადაც მაღალი თუ დაბალი შობადობაა და დაადაროთ ეკონომიკური ზრდის ტემპებს, მიხვდებით, რომ გარკვეული კავშირი ნამდვილად არსებობს.

ამ გამოწვევის საბოლოო გადაწყვეტა, სამწუხაროდ, არ არსებობს. არის სხვადასხვა პროგრამები, რომლითაც სახელმწიფო ცდილობს წაახალისოს ოჯახები. მათ შორის, საქართველოს ამ ხელისუფლებამ შემოიღო უფასო ბაღები, რაც ნაციონალური მოძრაობის დროს ფასიანი იყო. სკოლები უფასო იყო და გრძელდება, უმაღლესი განათლებაც უფასო გახდა სახელმწიფო უნივერსიტეტებში [...].

პარლამენტი ამ საკითხზე ყოველდღიურად მუშაობს. საქართველოს სტატისტიკა გვიჩვენებს ერთ საინტერესო მოვლენას: მესამე და მომდევნო შვილის შობადობის სტატისტიკა არის სტაბილურად მაღალი. ეს სტატისტიკა გაიზარდა მას შემდეგ, რაც პატრიარქმა ილია მეორემ მესამე და შემდეგი შვილის მონათვლის ინიციატივა დაიწყო.

სამწუხაროდ, დაბალი სტატისტიკა გვაქვს პირველ და მეორე შვილზე, რაც აჩვენებს, რომ ქორწინებების რაოდენობა ნაკლებია, ან წყვილები თავს იკავებენ და გვიან აჩენენ შვილებს. თუმცა, მესამე შვილთან დაკავშირებით სტაბილურად მაღალი მაჩვენებელია. ეს გვიჩვენებს, რომ დემოგრაფიული პროცესის მთავარი წინაპირობა არა იმდენად ეკონომიკურ თუ ფინანსურ პირობებშია, არამედ ადამიანურ მოტივაციაში.

სამწუხაროდ, რაც უფრო გაიზარდება ეკონომიკური კეთილდღეობა, დემოგრაფიული გამოწვევებიც იმატებს. კეთილდღეობის ზრდასთან ერთად ოჯახები თავებს იკავებენ, დაკავებულები არიან კარიერით და ბავშვის გაჩენასა თუ გაზრდას რაციონალურად გეგმავენ. ის, რაც მანამდე სპონტანური და ემოციური იყო, დღეს რაციონალურ გადაწყვეტილებებში გადადის, რის დროსაც ადამიანმა შეიძლება სხვაგვარად დაალაგოს პრიორიტეტები.

სწორედ ამიტომ ვთქვი მესამე შვილთან დაკავშირებით: როდესაც პატრიარქმა განაცხადა, რომ მესამე და მომდევნო შვილების ნათლია თავად იქნებოდა (და მადლობა მეუფე შიოს, რომ ამ პრაქტიკას აგრძელებს), ეს გახდა მთავარი მოტივატორი წყვილებისთვის. ამიტომ, საბაზისო ეკონომიკურ პირობებთან ერთად, უმნიშვნელოვანესია ემოციური და კულტურული მოტივატორები," — განაცხადა პაპუაშვილმა.

ცნობისთვის, საქართველოში 2026 წლის იანვარ-ივნისში ცოცხლად დაბადებულთა რიცხოვნობამ 17 509 ბავშვი შეადგინა. ამავე პერიოდში ქვეყანაში გარდაიცვალა 22 224 ადამიანი. განახლებული დემოგრაფიული მაჩვენებლები დღეს საქსტატმა გამოაქვეყნა.

შესაბამისად, 2026 წლის პირველ ნახევარში ბუნებრივი მატება (სხვაობა ცოცხლად დაბადებულთა და გარდაცვლილთა რიცხოვნობას შორის) უარყოფითი იყო და -4 715 კაცით განისაზღვრა.

ბუნებრივი მატების დადებითი მაჩვენებელი მხოლოდ თბილისსა (424) და აჭარის ავტონომიურ რესპუბლიკაში (330) დაფიქსირდა.

აღნიშნულ თემაზე ირაკლი კობახიძემაც ისაუბრა 18 თებერვალს პარლამენტში გამოსვლისას. კობახიძის აზრით, საქართველოში შობადობის შემცირებას სოციალური მიზეზი არ აქვს და ეს "მსოფლმხედველობის პრობლემაა". კობახიძემ ასევე დასძინა, რომ ეს ყველაფერი ე.წ ლიბერალური იდეოლოგიის გავრცელების ბრალია და მაგალითად 90-იანი წლები მოიყვანა, როცა, გაჭირვების მიუხედავად, საქართველოში ბევრად მაღალი შობადობის დონე იყო.

აღნიშნულ თემაზე NEWS.On.ge-მ ვიდეო რეპორტაჟი მოამზადა, სადაც მშობლები საქართველოში ბავშვის ყოლის სირთულეზე და სახელმწიფოსგან მხარდაჭერის ნაკლებობაზე საუბრობონ, სიუჟეტი იხილეთ აქ.