აქტივისტ კესო დეკანოსიძის გარდაცვალების გამოძიების მოთხოვნით, მოქალაქეებმა პროკურატურასა და შსს-ს განცხადებით მიმართეს. ისინი სამართალდამცავ უწყებებს სთხოვენ განმარტებას, დაწყებულია თუ არა სისხლის სამართლის გამოძიება კესო დეკანოსიძის გარდაცვალების ფაქტზე, რომელი მუხლით და როდის დაიწყო; რა საგამოძიებო მოქმედებები ტარდება; იმყოფებოდა თუ არა კესოს ტელეფონი უწყების ხელში მისი საჯარო ვიდეოების წაშლის დროს და შესწავლილია თუ არა ზღვაზე მისი გადაადგილების კამერების ჩანაწერები. ასევე, საზოგადოებრივი ინტერესიდან გამომდინარე, ითხოვენ აღნიშნული ვიდეომასალის გასაჯაროებას.

ოპოზიციონერი პოლიტიკოსი თეონა ჭალიძე ტელეკომპანია "ფორმულასთან" საუბრისას ამბობს, რომ "ძალიან ბევრი კითხვა აქვთ და საზოგადოების ვალდებულებაც კია, რომ დასვას შეკითხვები მაშინ, როდესაც ძალიან აქტიური ადამიანი, პროტესტის აქტიური მონაწილე, რომელიც ხშირად აპროტესტებდა უსამართლობას, რომელიც ასევე თავის სოციალურ ქსელში ათავსებდა ვიდეოებს, სადაც საუბრობდა სავარაუდო დანაშაულებრივ ფაქტებზე, უცებ, მოულოდნელად, ზღვაში იხრჩობა, იმ ვერსიით, რა ვერსიაც სოციალურ ქსელში გავრცელდა. აქედან გამომდინარე, ჩვენ ვალდებულები ვართ, რომ დასვათ შეკითხვა — ზუსტად რა გახდა მიზეზი მისი გარდაცვალების. ადამიანი...“

აქტივისტების მიერ პროკურატურასა და შსს-ში შეტანილ განცხადების ტექსტს სრულად გთავაზობთ:

"აშკარაა, რომ სამძებრო ღონისძიებებში ჩართული იყო შინაგან საქმეთა სამინისტროს შესაბამისი დანაყოფი, შესაბამისად, შინაგან საქმეთა სამინისტრო აღნიშნული ფაქტის შესახებ ინფორმირებულია. სისხლის სამართლის საპროცესო კოდექსის მე-100 მუხლის შესაბამისად, დანაშაულის შესახებ ინფორმაციის მიღების შემთხვევაში გამომძიებელი, პროკურორი ვალდებულნი არიან დაიწყონ გამოძიება. გამომძიებლის მიერ გამოძიების დაწყების თაობაზე დაუყოვნებლივ უნდა ეცნობოს პროკურორს. იმავე კოდექსის 37-ე მუხლის მეორე ნაწილის შესაბამისად, გამომძიებელი ვალდებულია გამოძიება აწარმოოს ყოველმხრივ, სრულად და ობიექტურად.

საგამოძიებო ორგანოების დადგენილი პრაქტიკის მიხედვით, მოცემულ შემთხვევაში გამოძიება, სავარაუდოდ, უნდა დაწყებულიყო სისხლის სამართლის კოდექსის 115-ე მუხლით, თვითმკვლელობამდე ან თვითმკვლელობის ცდამდე მიყვანა მსხვერპლისადმი მუქარით ან სასტიკი მოპყრობით, ანდა მისი პატივის ან ღირსების სისტემატური დამცირებით. მიუხედავად მაღალი საზოგადოებრივი ინტერესისა, შინაგან საქმეთა სამინისტროს ამ დრომდე არ გაუსაჯაროებია ინფორმაცია, დაიწყო თუ არა გამოძიება, რომელი მუხლით მიმდინარეობს გამოძიება და რა ეტაპზეა.

"პოლიციის შესახებ" საქართველოს კანონის მე-15 მუხლის პირველი და მეორე პუნქტების შესაბამისად, პოლიცია ვალდებულია თავისი საქმიანობის შესახებ საჯარო ინფორმაცია საქართველოს კანონმდებლობით დადგენილი წესით მიაწოდოს საზოგადოებრივ ორგანიზაციებსა და დაინტერესებულ პირებს. პოლიცია ვალდებულია საზოგადოებასა და მასობრივი ინფორმაციის საშუალებებს სწრაფად მიაწოდოს ობიექტური ინფორმაცია თავისი საქმიანობის შესახებ, იმგვარად, რომ არ გაახმაუროს სახელმწიფო, პროფესიული, კომერციული საიდუმლოების შემცველი ინფორმაცია, პერსონალური მონაცემები და გამოძიების მასალები, გარდა კანონით გათვალისწინებული შემთხვევებისა.

ამდენად, მიუხედავად კანონმდებლობით დადგენილი მოთხოვნებისა, საზოგადოება არ ფლობს ინფორმაციას კესო დეკანოსიძის გარდაცვალების საქმესთან დაკავშირებით. ასევე, ვინაიდან კესო დეკანოსიძის საჯარო ვიდეოები წაიშალა მისი ფეისბუქ გვერდიდან, არსებობს ეჭვი, რომ ტელეფონი მესამე პირების ან შესაძლოა ოჯახის წევრების ხელში აღმოჩნდა და გაუგებარია, რატომ არ ფლობდა ტელეფონს საგამოძიებო ორგანო კესოს გარდაცვალებიდან მეორე დღეს. ასევე, დანართის სახით წარმოგიდგენთ DVD დისკს, სადაც ჩაწერილია კესო დეკანოსიძის ვიდეოები. ეს ვიდეოები მნიშვნელოვანია, რადგან შესაძლოა შეიცავდეს ზემოთ ნახსენები გამოძიებისათვის მნიშვნელოვან მასალას, ან ახალი დანაშაულის ნიშნებს. აღნიშნული ტრაგედია იწვევს საზოგადოების მაღალ ინტერესს და არსებობს ლეგიტიმური კითხვები გამოძიების ობიექტურობასთან დაკავშირებით. ყოველივე ზემოაღნიშნულიდან გამომდინარე და ზოგადი ადმინისტრაციული კოდექსის მე-40 მუხლის პირველი ნაწილის შესაბამისად (საჯარო დაწესებულება ვალდებულია გასცეს საჯარო ინფორმაცია დაუყოვნებლივ), მოვითხოვთ შემდეგი ინფორმაციის მოწოდებას:

1. დაწყებულია თუ არა სისხლის სამართლის გამოძიება კესო დეკანოსიძის
გარდაცვალების ფაქტზე და კონკრეტულად რომელი მუხლით მიმდინარეობს
საქმისწარმოება? როდის დაიწყეთ გამოძიება?

2. რა საგამოძიებო მოქმედებები ტარდება საქმის სრულყოფილი, ობიექტური და
დროული გამოძიების მიზნით?

3. ფლობდით თუ არა კესო დეკანოსიძის ტელეფონს თქვენ მაშინ, როდესაც მისი
საჯარო ვიდეოები წაიშალა?

4. შესწავლილი გაქვთ თუ არა კესოს ზღვაზე გადაადგილების კამერის
ჩანაწერები? გთხოვთ, საზოგადოებრივი ინტერესიდან გამომდინარე საჯაროდ
გააზიაროთ აღნიშნული ვიდეო-მასალა", — წერია განცხადებაში.

შეგახსენებთ, რომ აქტივისტი კესო დეკანოსიძის ცხედარი ზღვამ გამორიყა. დეკანოსიძე საპროტესტო აქციებში აქტიურად მონაწილეობდა და მიმდინარე წლის 30 მარტს, ბიძინა ივანიშვილის გასამართლების მოთხოვნით, პარლამენტთან შიმშილობაც დაიწყო. გარდაცვალებამდე ცოტა ხნით ადრე კი სოციალურ ქსელში გამოაქვეყნა ვიდეოები, სადაც დედაზე, მანანა ოდიკაძეზე და მათ შორის არსებულ პოლიტიკურ უთანხმოებაზე საუბრობდა.

აღსანიშნავია, რომ კესო დეკანოსიძის გარდაცვალების შემდეგ აღნიშნული ვიდეოები მისი სოციალური ქსელის გვერდიდან წაიშალა.