რუსულმა დრონმა უკრაინა-პოლონეთის საზღვარზე იერიში მიიტანა მატარებლის სადგურზე, სადაც დარტყმამდე ცოტა ხნით ადრე დიდი ბრიტანეთის ყოფილი პრემიერ-მინისტრი ბორის ჯონსონი და უსაფრთხოების სფეროს ევროპელი მაღალჩინოსნები იმყოფებოდნენ. ინფორმაციას BBC ავრცელებს.

უკრაინული მხარის ცნობით, დრონმა დააზიანა მატარებლის ძრავი. მომხდარის გამო მატარებლიდან ყველა მგზავრის ევაკუაცია განხორციელდა. დაშავებულები არ არიან.

ცნობისთვის, ბორის ჯონსონი და ევროპელი მრჩევლები, იაგოდინის სარკინიგზო სადგურზე იერიშამდე იმყოფებოდნენ, თუმცა არა იმ მატარებელში, რომელზეც რუსული დრონით თავდასხმა განხორციელდა. ჯონსონი და სხვა მაღალჩინოსნები კიევიდან უკან ბრუნდებოდნენ, როდესაც იერიში განხორციელდა.

რუსულ მხარის ცნობით, მათ დასავლეთ უკრაინაში სარკინიგზო ინფრასტრუქტურას დაარტყეს, თუმცა უკრაინის სახელმწფო სარკინიგზო კომპანიის განცხადებით, "დიდი ალბათობით, დრონის სამიზნე დიპლომატიური მატარებელი იყო". განცხადებაში კომპანია ასევე აღნიშნავს, რომ დიპლომატების მატარებელმა სადგური დაგეგმილზე უფრო ადრე დატოვა განრიგის ცვლილების გამო. ამასთან, უკრაინის რკინიგზაში განაცხადეს, რომ აღნიშნულ სადგურზე ერთ-ერთ მატარებელში დრონის თავდასხმის დროს CIA-ს ყოფილი ხელმძღვანელი დევიდ პეტრეიესი იმყოფებოდა.

რუსული დრონით თავდასხმა პოლონეთის საზღვრიდან დაახლოებით 2 კილომეტრში მოხდა. პოლონეთში პრემიერ-მინისტრმა დონალდ ტუსკმა ბოლო განვითარებული მოვლენების განსახილველად საგანგებო შეხვედრა გამართა.

"რუსული მხარის ქმედებების ესკალაცია რეალობად იქცევა და ისინი ჩვენს საზღვარს სულ უფრო უახლოვდებიან", — განაცხადა მან.

აღსანიშნავია, რომ ჯონსონი და ევროპის უსაფრთხოების სფეროს სხვა მაღალი რანგის მრჩევლები კიევში გამართული იალტის ევროპული სტრატეგიის (YES) კონფერენციიდან ბრუნდებოდნენ. ეს ყოველწლიური ღონისძიებაა, რომელიც პოლიტიკის, ბიზნესის, უსაფრთხოებისა და მასმედიის სფეროების ლიდერებსა და ექსპერტებს აერთიანებს.