ნავთობის ფასი Brent-ის ტიპის ნავთობზე, შესაძლოა, წლის ბოლოსთვის ბარელზე 120 დოლარს გადასცდეს, თუ ახლო აღმოსავლეთში საბრძოლო მოქმედებები გაგრძელდება — ამის შესახებ Reuters-ის ცნობით, RBC Capital Markets-ის ანალიტიკოსმა, ჰელიმა კროფტმა განაცხადა.

"ჰუსიტების დაწინაურების გამო ბაბ-ელ-მანდების სრუტეში საზღვაო მიმოსვლას სერიოზული საფრთხე ემუქრება," — აღნიშნა ანალიტიკოსმა.

გავრცელებულ ცნობებით, იემენელმა ჰუსიტებმა წითელი ზღვის პორტ მოხაზე დაამყარეს კონტროლი, რაც მათ საშუალებას მისცემს, პირდაპირი იერიშები მიიტანონ საუდის არაბეთის ენერგოინფრასტრუქტურასა და წითელ ზღვაში მცურავ ტანკერებზე.

Reuters ცნობით, ეს კიდევ უფრო ამწვავებს ესკალაციას არაბეთის ნახევარკუნძულის მეორე მხარეს — ჰორმუზის სრუტეში, რამაც Brent-ისა და WTI-ის მარკის ნავთობის ფასები ბარელზე 100 დოლარს ზემოთ აიყვანა. დღეს, დღის პირველ მონაკვეთში Brent-ის ნავთობის ფასი თითქმის 110 დოლარამდე ავიდა.

ნავთობის ფასების ბოლო ზრდამ ობლიგაციების მომგებიანობის კიდევ ერთი ნახტომი გამოიწვია, რადგან ინფლაციურმა შიშებმა პიკს მიაღწია. ამან ინვესტორები აიძულა, მოემზადონ საკვანძო ბაზრების ცენტრალური ბანკების მიერ საპროცენტო განაკვეთების შესაძლო ზრდისთვის. JP Morgan-ის ახალი პროგნოზით, წლის ბოლომდე საპროცენტო განაკვეთები, შესაძლოა, განვითარებულმა 8 ან 9 ეკონომიკამ გაზარდოს, მათ შორის აშშ-მა, იაპონიამ, ევროპის ოთხმა ცენტრალურმა ბანკმა (მათ შორის ევროპის ცენტრალურმა ბანკმა), ასევე ავსტრალიამ და ახალმა ზელანდიამ.

"მონეტარული პოლიტიკის გამკაცრება ამ ეტაპზე ზომიერი იქნება, თუმცა ჩვენი პროგნოზის რისკები უფრო მკვეთრი ნაბიჯებისკენ იხრება — მდგრადი ეკონომიკური ზრდის, სტაბილურად მაღალი საბაზო ინფლაციისა და ნედლეულზე ფასების ზეწოლის ფონზე," — განაცხადეს ბანკის ანალიტიკოსებმა.

Bloomberg-ის ცნობით, დარტყმას აზიის ეკონომიკაც გრძნობს. გამოცემა აღნიშნავს, რომ რეგიონის მთავრობებს მოუწევთ ბიზნესისა და შინამეურნეობებისთვის ფინანსური დახმარების გაფართოება, რადგან ნავთობისა და დიზელის ფასები მკვეთრად იზრდება.

ახლო აღმოსავლეთში განვითარებული მოვლენების ფონზე მდგომარეობის შემსუბუქება ნაკლებად სავარაუდოა. პრეზიდენტმა ტრამპმა ამ კვირის დასაწყისში განაცხადა, რომ ომი ნოემბრის არჩევნების შემდეგ დასრულდება, თუმცა ბევრს ეჭვი შეაქვს ამაში, რადგან საბრძოლო მოქმედებები გრძელდება და სამშვიდობო მოლაპარაკებები არცერთ მხარეს არ უხსენებია.

გლობალურ სანავთობო ბაზარზე შექმნილი ვითარების გამო, საწვავის მნიშვნელოვანი გაძვირება საქართველოსაც შეეხო.