არასამთავრობო ორგანიზაცია "საფარის" ინფორმაციით, 20 წელი მიესაჯა პირს, რომელმაც ბავშვზე სექსუალურად იძალადა. საქმე ეხებოდა 14 წელს მიუღწეველი ბავშვის მიმართ უცხო კაცის მიერ განხორციელებულ გარყვნილ ქმედებას, რის შემდეგაც პირმა საქართველოს ტერიტორია დატოვა.

სასამართლოში არასრულწლოვანის ინტერესებს "საფარის" იურისტი ნინო ანდრიაშვილი იცავდა. ორგანიზაცია პირზე ძებნის გამოცხადებას და სასჯელის მოსახდელად მის ქვეყანაში დაბრუნებას მოითხოვს.

"2025 წელს საფარს არასრულწლოვანი გოგოს დედამ მიმართა. საქმე ეხებოდა 14 წელს მიუღწეველი ბავშვის მიმართ უცხო კაცის მიერ განხორციელებულ გარყვნილ ქმედებას, რის შემდეგაც პირმა საქართველოს ტერიტორია დატოვა. მომხდარიდან რამდენიმე დღის შემდეგ ბავშვმა ამ ამბის შესახებ ბებიას და დედას უამბო.

საქმეში საფარის იურისტი ნინო ანდრიაშვილი ჩაერთო. მასთან ერთად მოზარდმა პოლიციას მიმართა და გამოძიება დაიწყო, რომლის შედეგადაც სასამართლომ 2026 წლის პირველ სექტემბერს პირი დამნაშავედ ცნო და მას 20 წლით თავისუფლების აღკვეთა მიუსაჯა," — წერს ორგანიზაცია.