ბაქოში ვიზიტთან დაკავშირებით არანაირი შეთანხმება არ არსებობს, ეს ხმები სიმართლეს არ შეესაბამება — ამის შესახებ სომხეთის უშიშროების საბჭოს მდივანმა, ალენ სიმონიანმა პარასკევს ჟურნალისტებს განუცხადა. მან კომენტარი გააკეთა მთიანი ყარაბაღის ყოფილი სახელმწიფო მინისტრისა და ცნობილი ბიზნესმენის, რუბენ ვარდანიანის (რომელიც ამჟამად ბაქოს ციხეში იმყოფება) მეუღლის განცხადებაზე. ვარდანიანის მეუღლემ ალენ სიმონიანს მოუწოდა, ბაქოში სავარაუდო ვიზიტისას სომეხი პატიმრებიც მოინახულოს.

სომხეთის უშიშროების საბჭოს ხელმძღვანელმა აღნიშნა, რომ ბაქოში ვიზიტზე შეთანხმება არ ყოფილა და ამაზე საუბარიც კი არ მომხდარა.

"დიახ, იგეგმება, რომ გარკვეული ორმხრივი ვიზიტები შედგება. თუმცა, პირველ რიგში, ვისგან გაიგეთ, რომ საუბარი ბაქოზეა? ასეთი საუბარი არ ყოფილა. მეორეც, არანაირი საუბარი არ არის ვადებთან დაკავშირებით. მე ბაქოზე არ მილაპარაკია. გახსოვთ, რომ აზერბაიჯანის პრეზიდენტის თანაშემწე [ჰიქმეთ] ჰაჯიევი [სომხეთის] ქალაქ დილიჟანს ეწვია. შესაბამისად, იგეგმება, რომ გარკვეულ ეტაპზე სომხეთის უშიშროების საბჭოს მდივანიც ეწვევა აზერბაიჯანს, თუმცა არა ბაქოს — ლოგიკა გვაკარნახობს, რომ ეს სხვა ქალაქი იქნება, რადგან ჩვენც სხვა ქალაქში მივიღეთ [ჰაჯიევი] და არა დედაქალაქში", — განაცხადა სომხეთის უშიშროების საბჭოს მდივანმა.