ქართული ოცნების თავმჯდომარე, ირაკლი კობახიძე მიხეილ სააკაშვილთან დაკავშირებით აცხადებს, რომ გაუგებარია შიმშილობა მოთხოვნის წამოყენების გარეშე, ექსპრეზიდენტმა კი შიმშილობა ისე დაუწყო, რომ არანაირი მოთხოვნა არ აქვს.

"ერთი, რომ საერთოდ გაუგებარია შიმშილობა, როდესაც მოთხოვნასაც კი არ აყენებ. ანუ სააკაშვილმა დაიწყო შიმშილობა ისე, რომ საერთოდ არანაირი მოთხოვნა არ აქვს. ეს არის უპრეცედენტო მოვლენა არამარტო საქართველოს, არამედ მსოფლიო ისტორიაში. მე მახსოვს 35-წლიანი ისტორია საქართველოში შიმშილობების და არცერთი შიმშილობა არ მახსოვს მოთხოვნის გარეშე.

აქედან ჩანს ის, რომ მოთხოვნასაც კი ვერ აყენებს მიხეილ სააკაშვილი, ვერ აყენებენ ვერც მისი რეჟიმის წარმომადგენლები ერთი მარტივი მიზეზის გამო, მათ ძალიან კარგად იციან, ყველაზე უკეთ იციან, ჩვენზე კარგადაც იციან, თუ რა მძიმე დანაშაულები აქვს ჩადენილი 9 წლის განმავლობაში. ამას ეფუძნება ის, რომ ისინი მოთხოვნასაც კი ვერ აყენებენ შიმშილობის პროცესში", — ამბობს კობახიძე.

ექსპრეზიდენტი მე-19 დღეა შიმშილობს. მან დაკავების დღიდან გამოაცხადა შიმშილობა, ვინაიდან, როგორც პირველ ოქტომბერს სახალხო დამცველმა, ნინო ლომჯარიამ მისი მონახულების შემდეგ განაცხადა, ის არ ეთანხმება მსჯავრს და თავს პოლიტპატიმრად მიიჩნევს.