სპეციალური ოლიმპიადის ათლეტმა კრის ნიკიჩმა შაბათს, 7 ნოემბერს, ფინიშის ხაზი გადაკვეთა და გახდა დაუნის სინდრომის მქონე პირველი ადამიანი, რომელმაც "რკინის კაცის ტრიათლონი" დაასრულა.

გინესის მსოფლიო რეკორდებმა ნიკიჩის მიღწევა მას შემდეგ აღიარა, რაც მან პანამა-სითი-ბიჩში გამართულ ფლორიდის "რკინის კაცის ტრიათლონში" 3.86 კმ იცურა, 180 კმ ველოსიპედით იარა, 42 კმ ირბინა და ტრიათლონი წარმატებით დაასრულა.

ფოტო: Getty

"რკინის კაცი. მიზანი დასახული და მიღწეულია. დროა, 2021-ისთვის უფრო დიდი მიზანი დავისახო", — დაწერა ნიკიჩმა თავის Instagram-ზე.

ნიკიჩმა მარათონი 16 საათში, 46 წუთსა და 9 წამში გაიარა — 17-საათიან ლიმიტზე 14 წუთით ნაკლებ დროში.

სპეციალური ოლიმპიადის განცხადებით, ნიკიჩი მარათონისას ველოსიპედიდან ჩამოვარდა, საკვები პუნქტის გაჩერებასთან კი მას ჭიანჭველები დაესივნენ, თუმცა მან მაინც მოახერხა შეჯიბრის დასრულება.

"ძალიან შთაგონებულები ვართ და შენი მიღწევა 'რკინის კაცის' ისტორიის გადამწყვეტი მომენტია, რომელსაც ვერასდროს წაგართმევენ", — განაცხადა "რკინის კაცის ტრიათლონის" ორგანიზაციამ ტვიტერზე.

ორგანიზაციამ შეჯიბრის დღეს ისტორიული მარათონის განახლებებს სოციალურ ქსელში წერდა. ნიკიჩის სირბილის ბოლო ორი მილი "რკინის კაცის" Facebook-ის გვერდზე ლაივში აჩვენეს.

ფოტო: Getty

ნიკიჩმა და მამამისმა ნიკმა შეიმუშავეს "1%-ით გაუმჯობესების გამოწვევა", რათა ვარჯიშის დროს უფრო მოტივირებულები ყოფილიყვნენ. ნიკიჩის ვებსაიტის მიხედვით, ამის იდეა ისაა, რომ დაუნის სინდრომის ცნობადობა გაიზარდოს, პარალელურად კი ყოველდღიურად 1%-ით უკეთესი უნდა გახდე.

"კრისისთვის ეს მარათონი უფრო მეტი იყო, ვიდრე ფინიშის ხაზი და გამარჯვების ზეიმი. 'რკინის კაცი' მისთვის ის პლატფორმა იყო, რომლითაც ერთი საფეხურით მიუახლოვდებოდა უფრო ინკლუზიური და მოწინავე ცხოვრების მიღწევის მიზანს", — თქვა ნიკ ნიკიჩმა.

ნიკიჩის მიღწევას ცნობილი სპორტსმენები მილოცვებით შეეგებდნენ, მათ შორის ყოფილი ჩოგბურთელი ბილი ჯინ კინგი და მორბენალი კარა გუჩერი, აგრეთვე მას სოციალურ ქსელში მთელი მსოფლიოდან 33 000-ზე მეტი გამომწერი მიემატა.

ფოტო: Gett

ამ რეკორდული მიღწევის შემდეგ ნიკიჩის მთავარი მიზანია 2022 წლის აშშ-ის სპეციალურ ოლიმპიადაში მონაწილეობა და თავისი პლატფორმიდან სპეციალური ოლიმპიადისთვის, დაუნის სინდრომისა და RODS-ისთვის (დაუნის სინდრომის მქონე ობოლთა რბოლისთვის) ფულის შეგროვება.

"ჩემს მიზანს მივაღწიე და ახლა მსურს, ჩემნაირ ხალხს დავეხმარო", — დაწერა მან Instagram-ზე.