ვის მოგენატრათ ადამსების უცნაური და მისტიკური ოჯახი? თუ ჩვენსავით, ახალი სეზონის გამოსვლამდე დღეებს ითვლით, მაშინ სასიამოვნო სიახლე გვაქვს, რადგან Wednesday-ს ახალ სეზონს 6 აგვისტოს ვიხილავთ!

სერიალის პირველი სეზონი 2022 წელს გამოვიდა და დიდი წარმატება ხვდა წილად. ტიმ ბარტონის გადაღებულმა სერიალმა ემის 12 ნომინაცია მოიპოვა, მათ შორის მთავარი როლის შემსრულებელი ქალის, რომელიც ჯენა ორტეგას ერგო.

პირველი სეზონის გამოსვლიდან დიდი დრო გავიდა და, შესაძლოა, რამდენიმე მნიშვნელოვანი დეტალი არც კი გახსოვთ. სწორედ ამიტომ, თავი მოვუყარეთ გასული სეზონის საკვანძო სიუჟეტებს, რომლებიც აუცილებლად უნდა ვიცოდეთ, სანამ სერიალის მეორე სეზონს ვნახავთ.

უენსდეი ნევერმორის აკადემიაში ჩაირიცხა

სერიალის დასაწყისში ვხედავთ, როგორ ყრის უენსდეი ორ შეკვრა პირანიას ნენსი რეიგანის საშუალო სკოლის საცურაო აუზში. ერთ-ერთი მოცურავის, დალტონის, შესაშინებლად, რომელიც მის უმცროს ძმას, პაგსლის, აშინებდა. ამის გამო უენსდეი "ნორმის" საშუალო სკოლიდან გარიცხეს. მოგეხსენებათ, უენსდეი გარიყულების, ანუ განსაკუთრებული შესაძლებლობების მქონე ადამიანების ოჯახიდანაა, რაც მათ ჩვეულებრივი ადამიანებისგან გამოარჩევს

ამის შემდეგ, უენსდეი, სემესტრის შუა პერიოდში, გარიყულების სკოლაში, ნევერმორის აკადემიაში ჩაირიცხა.

უენსდეის ხილვები ნევერმორში რაღაც ცუდს წინასწარმეტყველებენ

გაკვეთილების დაწყებასთან ერთად, უენსდეის ხილვებიც დაიწყო.

ეს ხილვები მას მაშინ ემართება, როდესაც ადამიანს ან საგანს ეხება. პირველი წინათგრძნობა უენსდეის მაშინ დაეუფლა, როდესაც იერიქონში, თერაპიის სეანსიდან გამოქცეული, ფერმერს შეეჯახა. უენსდეიმ იწინასწარმეტყველა ფერმერის სიკვდილი, იდუმალი არსების მიერ, რომელმაც იერიქონისა (ქალაქი, სადაც ნევერმორის აკადემია მდებარეობს) და ნევერმორის მიმდებარე ტყეებში კიდევ რამდენიმე ადამიანი დახოცა.

კიდევ ერთი ხილვა უენსდეის მოსავლის ფესტივალზე ჰქონდა, როდესაც როუენის სიკვდილი მანამდე იწინასწარმეტყველა, სანამ ეს მოხდებოდა. უენსდეის ერთ-ერთ ხილვაში ნევერმორის შენობაც იწვოდა.

• Wednesday-ს მეორე სეზონში ლედი გაგა მიიღებს მონაწილეობას

როუენი და იდუმალი ურჩხული

ნევერმორის სტუდენტი, ტელეკინეტიკოსი როუენი, ამტკიცებდა, რომ 25 წლის წინ დედამისმა უენსდეიზე იწინასწარმეტყველა. მისი თქმით, როუანს ყველაფერი უნდა გაეკეთებინა უენსდეის შესაჩერებლად.

როუენმა — დედის თხოვნით — პირობა დადო, რომ ყველაფერს გააკეთებდა უენსდეისთვის ხელის შესაშლელად და მისი მოკვლა სცადა. თუმცა, საბოლოო ჯამში, როუენი იდუმალ ურჩხულს ემსხვერპლა.

მოგვიანებით, უენსდეი პოულობს წიგნს, სადაც ის ცეცხლის ფონზეა გამოსახული. წიგნის ზედა მარჯვენა კუთხეში გაცვეთილმა სიმბოლომ ის საიდუმლო საზოგადოება — "ღამის ჩრდილებამდე" მიიყვანა, რომლის წევრებიც ბიანკა, აიაქსი, ქსავიერი, დივინა, იოკო და კენტი იყვნენ.

სასიყვარულო სამკუთხედი

ქსავიერმა სერიალის დასაწყისშივე იხსნა უენსდეი გარგოილის ინციდენტისგან და ხელახლა წარუდგინა თავი მას შემდეგ, რაც ისინი ბავშვობაში —უენსდეის ერთ-ერთი ბებიის მეგობრის დაკრძალვაზე — შეხვდნენ.

პირველ სეზონში ქსავიერი უენსდეის ერთ-ერთ "სასიყვარულო პარტნიორად" გვევლინება, თუმცა უენსდეის გულის მოსაპოვებლად ქსავიერს ტაილერთან, ჩვეულებრივ ადამიანთან მოუწევს ბრძოლა, რომელსაც უენსდეი, შემთხვევით, კაფეში შეხვდა.

ჰაიდი

ამავდროულად, ბიძია ფესტერი, რომელიც პირველი სეზონის მე-7 ეპიზოდში გამოჩნდა, უენსდეის ტყეში ურჩხულის პოვნაში ეხმარება.

როდესაც უენსდეიმ ჰაიდის არსებობის შესახებ კვლევა დაიწყო, გაანალიზა, რომ მკვლელობებში პასუხისმგებელი ორი ადამიანი უნდა ეპოვა — თავად ჰაიდი და მისი მასწავლებელი.

როგორც აღმოჩნდა, ჩვეულებრივი ტაილერი, არც თუ ისე ჩვეულებრივია, რადგან ის ჰაიდი აღმოჩნდა. სინამდვილეში, მისი დედაც ჰაიდი იყო. როგორც გაირკვა, ტაილერის დედის მშობიარობის შემდგომმა დეპრესიამ, ტაილერის ეს მდგომარეობა გამოიწვია.

• Wednesday- ს მე-2 სეზონის გამოსვლის თარიღი ცნობილია — ყველაფერი, რაც ვიცით

ნევერმორის დირექტორი გარდაიცვალა

გახსოვთ რა შეემთხვა დირექტორ უიმს?

როგორც გაირკვა, ჩვენს საყვარელ დირექტორ უიმსს ერთი განსაკუთრებული ნიჭი აქვს — მას შეუძლია სხვა ადამიანად გადაიქცეს. იმის გასარკვევად თუ ვინ იყო ჰაიდი დირექტორმა უიმსმა და უენსდეიმ შეიმუშავეს გეგმა, სადაც უიმსი ტაილერად გადაიქცა.

ისიც ხომ არ გახსოვთ, ვინ იყო ჰაიდის მასწავლებელი? ვინ, თუ არა ნევერმორის აკადემიის ყველაზე "ნორმი" მასწავლებელი, მისის მერლინ ტორნჰილი. სამწუხაროდ, როდესაც დირექტორი უიმსი კვლავ თავის სხეულს დაუბრუნდა, ის მასწავლებელმა, მერლინ ტორნჰილმა, საწამლავით მოკლა.

ვიღაცამ კინაღამ "რაღაცა" მოკლა

ჰაიდისა და მისი მასწავლებლის ვინაობის გამჟღავნებამდე, ვიღაცამ "რაღაცას", ადამსების ოჯახის თანამგზავრს, დანა ჩაარტყა და უენსდეის ოთახში ჩამოკიდებული დატოვა. უენსდეიმ მოხერხებული თითი და თითები თავის ბიძა ფესტერს გადასცა, რათა ის ელექტროშოკით გაეცოცხლებინა.

ეს ალბათ უენსდეის ყველაზე ემოციური მდგომარეობა იყო,რადგან, როგორც ვიცით, მას მას 6 წლის შემდეგ არ უტირია.

უენსდეიმ ახალი ტელეფონი და მოთვალთვალე შეიძინა

პირველი სეზონის დასასრულს უენსდეიმ ქსავიერისგან საჩუქრად ტელეფონი მიიღო. თუმცა მოგვიანებით, ტელეფონზე უცნაურ შეტყობინებებს იღებს, უცნობი მოთვალთვალისგან.

იმის გასაგებად, როგორ განვითარდება მოვლენები, ძალიან ცოტა დრო რჩება.

აქვე შეგახსენებთ, რომ Wednesday-ს მეორე სეზონის პირველ ნაწილს (4 ეპიზოდს), 6 აგვისტოს, ხოლო მეორე ნაწილს (4 ეპიზოდს) 3 სექტემბერს ვიხილავთ.