სინდისის პატიმარს, ანატოლი გიგაურს მოსამართლე ჯვებე ნაჭყებიამ 2-წლიანი პატიმრობა მიუსაჯა.

მოსამართლემ ანატოლი გიგაურისთვის ბრალი გადააკვალიფიცირა — წარდგენილი 353-ე პრიმა მუხლი, რომელიც პოლიციელზე თავდასხმას გულისხმობს, სისხლის სამართლის კოდექსის 353-ე მუხლის პირველი ნაწილით შეიცვალა, რაც წინააღმდეგობას, მუქარას ან ძალადობას გულისხმობს საზოგადოებრივი წესრიგის დამცველის მიმართ.

განაჩენის გამოცხადებამდე, ანატოლიმ პროცესზე მყოფ მხარდამჭერებს ამ სიტყვებით მიმართა: "რაც არ უნდა გამოცხადდეს იყოს ოვაციები, არ მივცეთ რეჟიმს უფლება გაიმარჯვოს".

ნაციონალური მოძრაობის წევრის, ანატოლი გიგაურის განაჩენი 28 ივლისს უნდა გამოცხადებულიყო, მაგრამ განაჩენის გამოცხადება გადაიდო.

ცნობისთვის, ანატოლი გიგაური სამართალდამცავებმა 25 ნოემბერს დააკავეს. გამოძიების ინფორმაციით, ბრალდებული, ადგილზე საზოგადოებრივი წესრიგის დაცვისთვის მყოფ პატრულ-ინსპექტორს თავს დაესხა და მასზე ფიზიკურად იძალადა. ანატოლი გიგაურს ბრალი სისხლის სამართლის კოდექსის 353-ე პრიმა მუხლით ჰქონდა წარდგენილი, რაც პოლიციელზე თავდასხმას გულისხმობს.