"აგრესიულად პროვოკაციული და გამაღიზიანებელი ტონის მქონე", — ასე შეაფასეს ქარიშხლიანი უღელტეხილის ახალი ეკრანიზაცია საცდელი ჩვენების შემდეგ. ინგლისელი რეჟისორის, ემერალდ ფენელის, ფილმმა, რომელშიც მთავარ როლებს ჯეიკობ ელორდი და მარგო რობი ასრულებენ, სხვადასხვაგვარი შეფასებები დაიმსახურა.

ემილი ბრონტეს რომანის ამ მორიგმა კინოადაპტაციამ ერთ-ერთ მაყურებელს ფენელის წინა ნამუშევარი, Saltburn, მოაგონა "მანერული უხამსობით" და ისეთი სცენებით, როგორებიცაა "კლინიკური მასტურბაცია" და ბონდაჟის ტიპის სქესობრივი კავშირი ცხენის აღვირით. მაყურებელი ამტკიცებს, რომ ეკრანიზაცია შორსაა იმ ემოციური სიღრმისგან, რომელიც ბრონტეს ნაწარმოებს გააჩნია.

როგორც საცდელ ჩვენებაზე დამსწრეების მონაყოლით ირკვევა, ფილმი იწყება სიკვდილით დასჯის სცენით — ჩამოხრჩობის დროს კაცი ეაკულაციას განიცდის, რასაც ცერემონიაზე შეკრებილების თავაშვებულობა მოჰყვება, ერთ-ერთი მონაზონი კი გვამის ერეგირებულ გენიტალიას ხელს უსვამს. ამასთან, სხვა სცენებიც სავსეა ფენელისთვის დამახასიათებელი სექსუალური ქვეტექსტებით, მაგალითად, ისეთი სურათების ჩვენებით, როგორებიცაა კვერცხის გული, პურის ცომი და ლოკოკინას ნაკვალევი.

საცდელი ჩვენება კინოინდუსტრიაში გავრცელებული პრაქტიკაა. ის ფილმის შემქმნელებს შესაძლებლობას აძლევს, პირველად გამოხმაურებაზე დაყრდნობით მასობრივი აუდიტორიის რეაქცია იწინასწარმეტყველონ. საცდელი ჩვენებების შემდეგ, არაერთი ფილმის დასასრულიც კი შეცვლილა, მაგალითად ტიტანიკის და სამართებელზე მორბენალის.

თუმცა, ქარიშხლიანი უღელტეხილის ამ ეკრანიზაციას უარყოფითი გამოხმაურება ჯერ კიდევ საცდელ ჩვენებამდე მოჰყვა. მაყურებელთა ნაწილი შერჩეული მსახიობებით უკმაყოფილო იყო: მათი აზრით, 35 წლის მარგო რობის 18 წლის ქეთრინ ერნშოუს როლის შესასრულებლად ასაკი არ უწყობდა ხელს, ავსტრალიელ ჯეიკობ ელორდის კი — წარმომავლობა, რადგან მისი პერსონაჟი, ჰითკლიფი, ბოშად მიიჩნევა. თუმცა, პროექტის ქასთინგ მენეჯერი კარმელ კოქრეინი ამტკიცებს, რომ ფილმის პირველწყარო, "უბრალოდ, წიგნია" და სიზუსტე "საჭირო არ არის".

"ინგლისური ლიტერატურის ბევრი ფანი უკმაყოფილო იქნება", — აღნიშნავს კოქრეინი, — "თქვენ სასცენო დეკორაციები უნდა ნახოთ, ეს კიდევ უფრო შოკისმომგვრელია".

ფენელის ფილმის პრემიერა 2026 წლის ვალენტინობის დღისთვის იგეგმება. აღსანიშნავია, რომ $150-მილიონიანი წინადადების მიუხედავად, ნეტფლიქსს ქარიშხლიანი უღელტეხილი არ ერგო — პროდიუსერებმა, მათ შორის, მარგო რობიმ, კინოდისტრიბუცია და მარკეტინგული კამპანიის ჩატარება Warner Bros.-ს მიანდვეს. კომპანიამ ფილმზე უფლებები $80 მილიონის სანაცვლოდ მიიღო.

ქარიშხლიანი უღელტეხილი ემილი ბრონტეს ერთადერთი რომანია, რომელიც მწერალმა, თავისი დების მსგავსად, კაცის სახელით, ელის ბელის ფსევდონიმით გამოსცა 1847 წელს. რადგან ემილი მომდევნო წელს გარდაიცვალა, ნაწარმოების მეორე გამოცემის რედაქტორობა შარლოტ ბრონტემ, ჯეინ ეარის ავტორმა, ითავა.

საუკუნე-ნახევარზე მეტი გავიდა ქარიშხლიანი უღელტეხილის გამოცემიდან, მაგრამ უკვე კლასიკად ქცეული ეს გოტიკური ნაწარმოები ყოველთვის ხვდება საუკეთესო ინგლისურენოვან რომანებს შორის. წიგნი არაერთი თანამედროვე ხელოვანისთვისაც ქცეულა შთაგონების წყაროდ, მის მიხედვით უამრავი ფილმი, სერიალი და სპექტაკლი შექმნილა.