როგორც იქნა, მალე ჩვენს ლოდინს ბოლო მოეღება: სერიალ ეიფორიის (Euphoria) გაგრძელებას ვიხილავთ.

ამის შესახებ ეს მოულოდნელად სასიამოვნო ინფორმაცია სერიალში მთავარი როლის შემსრულებელმა, ზენდეიამ სოციალურ ქსელებში თავის ოფიციალურ გვერდებზე გაავრცელა:

"ისინი ჩვენც ძალიან მოგვენატრნენ. ეიფორიის ორი სპეციალური ეპიზოდი მალე გამოვა: მათ შორის პირველი 6 დეკემბერს", — წერს მსახიობი.

ამ გახმაურებული სატელევიზიო შოუს ორი სპეციალური ეპიზოდი პანდემიის პირობებში უსაფრთხოების ზომების მაქსიმალური დაცვით გადაიღეს. პირველი სერიის სახელწოდება, რომლის პრემიერაც 6 დეკემბერსაა დაგეგმილი, Trouble Don’t Last Always (გასაჭირი სამუდამოდ არ გრძელდება) იქნება და ის ძირითადად კვლავ მთავარი გმირის, რუს ირგვლივ განვითარდება, რომელიც მატარებლის სადგურზე ჯულსმა დატოვა.

რაც შეეხება მეორე ეპიზოდის სახელწოდებას, სიუჟეტის დეტალებსა და გამოსვლის თარიღს, HBO ამ ინფორმაციას მოგვიანებით დააანონსებს.

ზენდეიამ ჯერ კიდევ აგვისტოში განაცხადა, რომ შემოქმედებითი გუნდი აქტიურად მუშაობდა, რათა მეორე სეზონის გამოსვლამდე მაყურებლებისთვის "შუალედური" ეპიზოდები შეეთავაზებინათ: პანდემიამ მეორე სეზონის გადაღება შეაფერხა და მას 2021 წლამდე ვერ იხილავს მაყურებელი.

აღსანიშნავია, რომ ეიფორიის გულშემატკივრებისთვის ეს სასიამოვნო ინფორმაცია თითქმის ერთი თვის თავზე გახდა ცნობილი, როცა ზენდეიას სწორედ ამ სერიალში შესრულებული როლით ემის ჯილდო გადაეცა და ამით ყველაზე ახალგაზრდა მსახიობი გახდა, ვისაც ნომინაციაში საუკეთესო ქალი მსახიობი დრამატულ სერიალში გაუმარჯვია.