1938 წლის იშვიათი კომიქსის ასლი, რომელმაც სუპერმენი პირველად გააცნო მსოფლიოს, ანონიმურმა კოლექციონერმა 15 მილიონ დოლარად იყიდა.

Action Comics No. 1-ის ასლის კერძო გაყიდვის შესახებ პარასკევს გახდა ცნობილი. ეს კომიქს ერთ დროს მსახიობ ნიკოლას ქეიჯის სახლიდან იყო მოპარული და მას ათწლეულზე მეტი ხნის შემდეგ დაუბრუნდა.

მანამდე კომიქსის გაყიდვის რეკორდი ნოემბერში დამყარდა, როდესაც იდეალურ მდგომარეობაში მყოფი Superman No. 1 აუქციონზე 9.12 მილიონ დოლარად გაიყიდა. ორივე ეს თანხა მნიშვნელოვნად აღემატება კომიქსების თავდაპირველ ფასს, 10 ცენტს, ანუ დღევანდელი ღირებულებით დაახლოებით 2.25 დოლარს.

კომიქსმა გაგვაცნო სუპერმენი პირველად 1938 წელს, მისი ღირებულება 10 ცენტი იყო.

ფოტო: Wilson/Metropolis Collectibles Inc, via Getty Images

სუპერმენის დებიუტი Action Comics No. 1-ში შესული რამდენიმე ისტორიის ერთ-ერთი ნაწილია. 1938 წლის ეს გამოცემა მიიჩნევა იმ ნამუშევრად, რომელმაც სუპერგმირების ჟანრი იმ სახით განსაზღვრა, როგორსაც დღეს ვიცნობთ. ითვლება, რომ ამ კომიქსის მხოლოდ ასზე ნაკლები ასლია შემორჩენილი.

აღსანიშნავია, რომ კომიქსის ღირებულება დამატებით გაიზარდა მისი ჰოლივუდის ვარსკვლავ ნიკოლას ქეიჯთან დაკავშირებული ისტორიის გამო.

ფილმების Con Air და National Treasure ვარსკვლავმა ეს კონკრეტული ასლი 1996 წელს 150,000 დოლარად შეიძინა, რაც იმ დროისთვის რეკორდული თანხა იყო.

თუმცა 2000 წელს, ქეიჯის სახლში გამართული წვეულების დროს, კომიქსი მოიპარეს და მხოლოდ 2011 წელს აღმოაჩინეს.

"იმ 11 წლის განმავლობაში მისი ღირებულება ცაში ავარდა. ქურდმა ნიკოლას ქეიჯს დიდი საქმე გაუკეთა მისი მოპარვით" — თქვა Metropolis/ComicConnect-ის გენერალურმა დირექტორმა სტივენ ფიშლერმა.

კომიქსი მსახიობს დაუბრუნდა და ექვსი თვის შემდეგ მან ის აუქციონზე 2.2 მილიონ დოლარად გაყიდა.

ფიშლერმა კომიქსის ეს ისტორია შეადარა 1911 წელს ლეონარდო და ვინჩის მონა ლიზას ქურდობას ლუვრის მუზეუმიდან, შემთხვევას, რომელმაც მანამდე შედარებით ნაკლებად ცნობილი ნამუშევარი მსოფლიოს ყველაზე ცნობილ ნახატად აქცია.

"ნახატის დაბრუნებამ მონა ლიზა უბრალოდ და ვინჩის დიდი ნამუშევრიდან მსოფლიო სიმბოლოდ აქცია, და სწორედ ეს არის Action Comics No. 1: ამერიკული პოპ-კულტურის სიმბოლო".