საგარეო საქმეთა მინისტრის, დავით ზალკალიანის განცხადებით, პრემიერ-მინისტრისგან მიიღეს დავალება, რომ უცხოეთიდან საქართველოში დასაბრუნებელ რეისებზე ბილეთის ფასი არ აღემატებოდეს €199-ს. მისი თქმით, ეს წესი უნდა დაიცვას ავიაკომპანიამ, რომელიც განახორციელებს ამ რეისებს.

"გვესმის, რომ ბიზნესი მძიმე მდგომარეობაშია, ამიტომ აუცილებელია, რომ ეს ჭერი მტკიცედ იყოს დაცული ავიაკომპანიის მიერ", — განაცხადა მან.

მინისტრმა დაასახელა ფრენების განრიგიც:

• 23 მარტს შესრულდება საქართველოს ავიახაზების რეისი ბერლინის მიმართულებით და უკან;
• 24 მარტს ეგეოსის ავიახაზები საბერძნეთიდან თბილისში ჩამოიყვანს საქართველოს მოქალეებს და საბერძნეთის მოქალაქეებს წაიყვანს უკან;
• 26 მარტს შესრულდება საქართველოს ავიახაზების რეისი ვენის მიმართულებით და უკან;
• 31 მარტს შესრულდება საქართველოს ავიახაზების რეისი ამსტერდამის მიმართულებით და უკან;
• 3 აპრილს შესრულდება საქართველოს ავიახაზების რეისი ვარშავის მიმართულებით და უკან;
• 7 აპრილს შესრულდება საქართველოს ავიახაზების რეისი ათენის მიმართულებით და უკან;
• 10 აპრილს შესრულდება საქართველოს ავიახაზების რეისი ლარნაკაში და უკან.

23 მარტს, ღამით, ბრიფინგზე პრემიერ-მინისტრმა, გიორგი გახარიამ განაცხადა, რომ საქართველოს ავიახაზების დირექტორი "ელოდება იმას, რაც უფრო მეტ ფულს გადაუხდიან". ასე გამოეხმაურა ის აირზენას ხელმძღვანელის განცხადებას, რომელიც ამბობდა, რომ მზადაა ნებისმიერი რეისი განახორციელოს, თუმცა ამის უფლებას მთავრობა არ აძლევს.

საგანგებო მდგომარეობის პირობებში საქართველოში ფრენები მხოლოდ მთავრობის განკარგულებითაა დაშვებული. მინისტრების განმარტებით, საქართველოში დაბრუნებული მოქალაქეებისთვის სავალდებულოა კარანტინი, ამიტომ მათ უნდა დაახვედრონ შესაბამისი ინფრასტრუქტურა, რასაც მომზადება სჭირდება და ფრენებიც ამის მიხედვით იგეგმება.

კარანტინი 2 რაიონში და საგანგებო მდგომარება ქვეყანაში: ახალი შეზღუდვები და რეკომენდაციები

ბოლო მონაცემებით, საქართველოში კორონავირუსით ინფიცირების 54 შემთხვევაა დაფიქსირებული, აქედან გამოჯანმრთელდა 8 პაციენტი. კარანტინში მოთავსებულია 3 320 ადამიანი, სტაციონარში მეთვალყურეობის ქვეშ კი 235.

კორონავირუსის გავრცელების გამო ქვეყანაში საგანგებო მდგომარეობაა გამოცხადებული და სხვადასხვა აკრძალვებია დაწესებული, მათ შორის აკრძალულია 10-ზე მეტი ადამიანის შეკრება.

• რა შეზღუდვებს ითვლისწინებს საგანგებო მდგომარეობა

მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ჯანდაცვის სამინისტროს დაევალა, მარნეულსა და ბოლნისში დაიწყოს ტესტირების სპეციალური პროგრამა. ჯანდაცვის მინისტრის თქმით, სწრაფი ტესტები ქვეყანაში ხვალიდან შემოვა.

გარდა ამისა, მთავრობის გადაწყვეტილებით, საქალაქთაშორისო გადაადგილება აიკრძალა ყველა სახის ტრანსპორტით, გარდა პირადი ავტომობილებისა. თბილისის მერიის გადაწყეტილებით კი შეზღუდვები დაწესდა ტაქსებზე. კერძოდ, მხოლოდ 2 მგზავრის გადაყვანა შეიძლება უკანა სავარძლებზე და ფანჯრები უნდა იყოს ღია.

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა. კერძოდ:

• მუშაობა შეწყვიტა ყველა სავაჭრო ობიექტმა სასურსათო მაღაზიების, სააფთიაქო და საფოსტო ქსელების, ბენზინგასამართი სადგურებისა და ბანკების გარდა;
• აიკრძალა სამარშრუტო ტაქსების გადაადგილება;
• საზღვარი დაკეტილია ყველა უცხო ქვეყნის მოქალაქისთვის;
• საჰაერო მიმოსვლა შეწყდა ყველა კომპანიისთვის საქართველოს ავიახაზების გარდა;
• ყველას, ვინც საქართველოს საზღვარს გადმოკვეთს, კარანტინში გაუშვებენ;
• საჯარო დაწესებულებების ნაწილმა, მათ შორის, შსს-ს მომსახურების სააგენტომ და იუსტიციის სახლმა მომსახურებები შეზღუდა;

გარდა ამისა, როგორც კერძო, ისე საჯარო სექტროს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე:

• აუცილებელი რეკომენდაციები კორონავირუსისგან თავის დასაცავად
• რეკომენდაციები თვითიზოლაციაში მყოფი პირებისთვის
• რეკომენდაციები კარანტინში მყოფებისთვის
• როგორ უნდა გაიკეთოთ, გამოიყენოთ და გადააგდოთ ნიღაბი
• როგორ დავიბანოთ ხელები სწორად კორონავირუსისგან დასაცავად.