"დაფინანსების კომპონენტი სახელმწიფო უნივერსიტეტებში შემდეგი წლიდან პირველ კურსელებზე აღარ იქნება. ფაქტობრივად უფასო ხდება სწავლა [იმათთვის], ვინც ჩააბარებს," — განაცხადა ოცნების ხელისუფლების განათლებისა და მეცნიერების მინისტრმა გივი მიქანაძემ "რუსთავი 2"-ის ეთერში განათლების რეფორმაზე საუბრისას.

მისი თქმით, 2026 წლიდან კერძო უნივერსიტეტებში ჩარიცხული სტუდენტები სახელმწიფო დაფინანსებას ვეღარ მიიღებენ. სახელმწიფო უნივერსიტეტში ჩარიცხულ სტუდენტებს კი საფასურს სრულად სახელმწიფო დაუფინანსებთ, რაც მიქანაძის თქმით "კონკურენციას გაზრდის".

აღნიშნული საგრანტო ცვლილებები უკვე ჩარიცხულ სტუდენტებს არ შეეხებათ და ისინი მოქმედი გრანტით გააგრძელებენ სწავლას სასწავლო ციკლის დასრულებამდე.

"მეორე კურსიდან და მიმდინარე რაც არის ჩვეულებრივად დარჩება იმ საგრანტო დაფინანსებაზე, ოღონდ მილევად რეჟიმში. რაც შეეხება ახლად მიღებულ სტუდენტებს, ამ მოცემულობაში უკვე რაიმე ვაუჩერული და საგრანტო დაფინანსება აღარ იქნება როგორც საჯარო, ასევე კერძოებისთვისაც, სადაც გრანტს რომ მოიპოვებოდნენ, მოხდებოდა ჩარიცხვა. ამ შემთხვევაში, კონკურენციაც, რა თქმა უნდა, მატულობს. მოცემულობა არის ის, რომ სახელმწიფო უნივერსიტეტები წარადგენენ თავის საჭიროებებს და ჩვენ ამ საჭიროებების მიხედვით გამოვყოფთ ფინანსურ ასიგნებებს, რაც დაკავშირებული იქნება როგორც სახელფასო საკითხებთან, ასევე მატერიალურ-ტექნიკური ბაზის უზრუნველყოფასთან და ა.შ. ახლა გვაქვს ჩვენ შემდეგი სამი-ოთხი წელიწადი გარდამავალი პერიოდი. თუმცა კომპონენტი, რომელიც საგრანტო დაფინანსებას ეხება, შემდეგი სასწავლო წლიდან ამოქმედდება. საგრანტო კომპონენტი პირველკურსელებთან დაკავშირებით შემდეგი წლიდან აღარ იმოქმედებს," — თქვა მიქანაძემ "რუსთავი 2-ს" ეთერში.