საგანგებო სიტუაციების მართვის სამსახურმა მარნეულში საველე ჰოსპიტალი მოაწყო. უწყებას მარნეულისა და ბოლნისის მუნიციპალიტეტებში საველე ინფრასტრუქტურის მოწყობა მთავრობის უწყებათშორისი საკოორდინაციო საბჭოს გადაწყვეტილებით დაევალა.

საგანგებო სიტუაციების მართვის სამსახურის ცნობით, საველე ჰოსპიტალის გარდა, ადგილზე მოეწყო სპეციალური სივრცე, სადაც ინტენსიურად მოხდება იმ პერსონალის დეზინფექცია, ვისაც შეხება ექნება საველე ჰოსპიტალში მყოფ პირებთან.

ფოტო: საგანგებო სიტუაციების მართვის სამსახური

მათივე ინფორმაციით, შესაბამის სამუშაოებს საგანგებო სიტუაციების მართვის სამსახურის ქიმიურ, ბიოლოგიურ, რადიაციულ და ბირთვულ ინციდენტებზე რეაგირების ჯგუფები ჩაატარებენ.

საქართველოს მთავრობის გადაწყვეტილებით, მაღალი ეპიდემიოლოგიური რისკის
გამო, 23 მარტიდან მარნეულისა და ბოლნისის რაიონი მკაცრ საკარანტინო რეჟიმზე გადავიდა. საკარანტინო პირობები მარნეულის და ბოლნისის მუნიციპალიტეტებში, მათ შორის, მოქალაქეთა შესვლისა და გამოსვლის შეზღუდვას ითვალისწინებს. ქალაქში შემსვლელ და გამსვლელ საგანგებოდ მოწყობილ სპეციალურ გამშვებ პუნქტებზე კონტროლს პოლიცია და თავდაცვის ძალები ახორციელებენ.

ასევე, იზღუდება ყველა ობიექტი, საკვებისა და აფთიაქების გარდა. მთავრობამ დაუშვა გამონაკლისიც და იმ შემთხვევაში, როდესაც პროტოკოლით გაიწერება, მარნეულის მოსახლეობას სასოფლო-სამეურნეო სამუშაოების ჩატარება შეეძლება.