საქართველოს ბანკის პარტნიორი კომპანია აგროჰაბი საკუთარი ქსელის გაფართოებას აგრძელებს. ამჯერად ჰიპერმარკეტის ახალი ფილიალი ქუთაისში, ი. ჭავჭავაძის გამზირზე, #19-ში გაიხსნა.

ახალი ფილიალი სავაჭრო ტერიტორიას, კაფეს, ტერასასა და გარე და შიდა საპარკინგე სივრცეებს აერთიანებს. ის სრულად მომხმარებლის ინტერესებზეა მორგებული. ფილიალში დასაქმებულია 300-ზე მეტი ადგილობრივი თანამშრომელი. საწარმოში კი ყოველდღიურად 1,000-ზე მეტი დასახელების პროდუქტი მზადდება.

ინფორმაციისთვის: აგროჰაბის პირველი ფილიალი 2016 წელს გაიხსნა და ის აგროპროდუქტების პირველი ჰიპერმარკეტია საქართველოში. კომპანია თავად აწარმოებს სხვადასხვა პროდუქტს. მას აქვს ISO22000 სტანდარტით სერტიფიცირებული რძის გადამამუშავებელი ქარხანა, ფერმები, ხორცპროდუქტების, პურ-ფუნთუშეულის, საკონდიტროს, ნახევარფაბრიკატებისა და საკონსერვო საამქროები, ასევე საკუთარი ღვინის მარანი. აღსანიშნავია, რომ აგროჰაბში წარმოდგენილი პროდუქტები ნატურალური ქართული ნედლეულისგან მზადდება და წარმოების ყველა ეტაპზე მრავალსაფეხურიან შემოწმებას გადის.

“აგროჰაბის ქუთაისის ფილიალი არის რიგით მეორე, ბათუმის შემდეგ, რომელიც რეგიონის მასშტაბით გაიხსნა. ჩვენი მიზანია, უფრო მეტ მომხმარებელს ჰქონდეს მაღალი ხარისხის პროდუქტსა და მომსახურებასთან წვდომა. ჩვენთვის ეს ზრდისა და მომხმარებელთან დაახლოებისკენ გადადგმული კიდევ ერთი ნაბიჯია, ხოლო რეგიონისთვის ეკონომიკური სტიმული, რადგან მსგავსი ინიციატივები ქალაქში ახალ შესაძლებლობებს ქმნის და დასაქმებას უწყობს ხელს.

საქართველოს ბანკთან მრავალწლიანი პარტნიორობა ჩვენი საქმიანობის სტაბილურად განვითარების მნიშვნელოვანი ფაქტორია. ეს არის თანამშრომლობა, რომელიც საერთო ხედვას ეფუძნება — ხელი შევუწყოთ ქართული წარმოების განვითარებას, მომხმარებლების წახალისებასა და ეკოსისტემის გაძლიერებას. წლების განმავლობაში ერთობლივად არაერთი ინიციატივა განვახორციელეთ, მათ შორის: ფერმერული და სასათბურე მეურნეობების გაძლიერება, ცენტრალური წარმოების გაფართოება და უახლესი პროექტი — ცენტრალური წარმოების მზის პანელებით აღჭურვა, რაც ენერგოეფექტიანობისა და მდგრადი განვითარების მიმართულებით გადადგმული მნიშვნელოვანი ნაბიჯია.

გარდა ამისა, ერთობლივად შექმნილმა აქციებმა და შეთავაზებებმა ათასობით ერთგული მომხმარებელი გააერთიანა, რაც კიდევ ერთხელ ადასტურებს, რომ ამ პარტნიორობის მიზანი ნამდვილად მომხმარებლის კმაყოფილებაზეა ორიენტირებული. სამომავლოდ ეს თანამშრომლობა კიდევ უფრო გაღრმავდება და ჩვენ მათ არაერთ საინტერესო ინიციატივას შევთავაზებთ“, — განაცხადა აგროჰაბის დირექტორმა, გიორგი ჯაშიაშვილმა

ინფორმაციისთვის: აგროჰაბის ქუთაისის შენობის დიზაინზე არქიტექტურულმა კომპანია სტუდია9-მ იმუშავა, რომელიც 2025 წელს პრესტიჟული საერთაშორისო არქიტექტურული კონკურსის Architizer A+Awards-ის გამარჯვებული გახდა.