ოცნების პრემიერი ირაკლი კობახიძე "ფორმულას" ჟურნალისტის კითხვის საპასუხოდ ამბობს, რომ "ორ შეხვედრაზე იყო ღიად საუბარი მეორე ფრონტის გახსნაზე", თუმცა, ეროვნული ინტერესებიდან გამომდინარე, არ ასახელებს ვინ სთხოვდა ქართულ მხარეს რუსეთის წინააღმდეგ ომის დაწყებას.

"გაიმართა სამი სხვადასხვა შეხვედრა, ერთ-ერთს ვესწრებოდი პირადა მე, ეს იყო თებერვლის პირველ ნახევარში, მეორე თებერვლის ბოლოს, ომის იყო 2-3 დღის დაწყებული, ომის დაწყებიდან მალევე, მესამე შეხვედრა შედგა მარტის შუა რიცხვებში. ამ სამი შეხვედრიდან ორ შეხვედრაზე იყო ღიად საუბარი მეორე ფრონტის გახსნაზე. მათ შორის ასეთი სიტყვები იყო გამოყენებული, მაგალითად — როცა კითხვა დაისვა დაუშვათ ვეღარ შევაკავეთ აგრესია რა ხდება ამ შემთხვევაში, ეგრევე გვითხრეს, რომ პარტიზანულ ომზე უნდა გადახვიდეთო — ქვეყანა თავზე რომ დაგექცევათ ტყიდან იომეთო. ამ დონეზე დეტალებზე მიდიოდა საუბარი", — თქვა კობახიძემ.

ჟურნალისტის კითხვაზე — არ უნდა ვიცოდეთ ვინ გითხრათ ამის შესახებ?, კობახიძე პასუხობს, რომ "არ ივარგებს ამის თქმა ეროვნული ინტერესებიდან გამომდინარე.

"არ ივარგებს [დავასახელოთ ვინ გვითხრა ეს] ეროვნული ინტერესებიდან გამომდინარე, ეროვნული უსაფრთხოების ინტერესებიდან გამომდინარე", — პასუხობს კობახიძე.

ჟურნალისტის ჩაკითხვაზე —ამერიკულ პარტნიორებზე საუბრობს თუ არა, ოცნების პრემიერმა გაიმეორა — "ეროვნული ინტერესებიდან გამომდინარე არ ივარგებს მეტი დეტალის თქმა".