BBC-ის მიერ გავრცელებულ ინფორმაციაზე შეგვიძლია ვთქვათ, რომ ამ მოკლე ტყუილს საერთოდ არანაირი ფეხები არ აქვს, ამის შესახებ მთავრობის სატელიტი პარტია ხალხის ძალის ლიდერმა, გურამ მაჭარაშვილმა BBC-ის გამოძიებაზე განაცხადა.

"როგორც ამბობენ, ტყუილს აქვს მოკლე ფეხები და ზოგიერთ ტყუილს, განსაკუთრებით, ბოლო პერიოდში, საერთოდ არ აქვს ფეხები. BBC-ის მიერ გავრცელებულ ინფორმაციაზე შეგვიძლია ვთქვათ, რომ ამ მოკლე ტყუილს საერთოდ არანაირი ფეხები არ აქვს. ის "მტკიცებულებებს" რაც ე.წ. წყარომ მიაწოდა BBC-ის ე.წ. ქიმიურ იარაღის გამოყენებასთან დაკავშირებით, აღმოჩნდა რამდენიმე საათიანი, არც კი — რამდენიმე წუთიანი, იმიტომ რომ რამდენიმე საათში გაემიჯნა ის მთავარი "წყარო", რომელიც გახდა იმისი საფუძველი, რომ გამოექვეყნებინა ეს დეზინფორმაცია", — განაცხადა მთავრობის სატელიტი პარტია ხალხის ძალის ლიდერმა, გურამ მაჭარაშვილმა BBC-ის გამოძიებაზე.

ის პარტია გახარია საქართველოსთვის ინიციატივასაც გამოეხმაურა საგამოძიებო კომისიის შექმნასთან დაკავშირებით. მაჭარაშვილი ამბობს, რომ "მათ მონაწილეობა არ მიიღეს მართლაც ისტორიულ საგამოძიებო კომისიაში", ახლა კი "უნდათ, შექმნან კომისია, რომელიც დაადგენს, თუთიყუშს ბუმბული გასცვივდა თუ არა".

"მათ მონაწილეობა არ მიიღეს მართლაც ისტორიულ საგამოძიებო კომისიაში, სადაც კვოტები ჰქონდათ და ახლა უნდათ შექმნან კომისია, რომელიც მათი აზრით, დაადგენს იმას, თუთიყუშს ბუმბული მართლა გასცვივდა თუ არა და ძაღლმა აკოცა თუ არა თავის პატრონს იმ პერიოდში, როცა დეკემბერში იყო აქციები და რაღაც ქიმიური იარაღი იყო გამოყენებული. ეს არის მათი მიდგომა? პრაქტიკულად, შეგვიძლია ვთქვათ, რომ მთავარი წყარო გაემიჯნა BBC-ის. რა თქმა უნდა, უნდა დაველოდოთ გამოძიებას, რომელიც დარწმუნებული ვარ, დაადგენს, ნამდვილად იყო თუ არა გამოყენებული, რა იყო შეძენილი, როდის იყო. ეს ინიციატივა ნიშნავს, რომ რამენაირად პოლიტიკურ ზედაპირზე იტივტივონ, მეტი არაფერი. ეს არ არის ის საკითხი, რომელიც ამ ეტაპზე შეიძლება იყოს საგამოძიებო კომისიის საკითხი," — განაცხადა მაჭარაშვილმა.

შეგახსენებთ, რომ BBC-ის გამოძიებაში ნათქვამია, რომ ქართულმა ოცნებამ გასული წლის საპროტესტო აქციების დასაშლელად მოქალაქეების წინააღმდეგ პირველი მსოფლიო ომის ქიმიური იარაღი გამოიყენა".