ოცნების პრემიერი ირაკლი კობახიძე BBC-ის გამოძიებაზე საუბრისას აცხადებს, რომ კონკრეტული ნივთიერება 2007 და 2009 წელს, 2-ჯერ იქნა შეძენილი და ის გამოიყენებოდა 2007 წლიდან — 2008-ში, 2009-ში, მერე 2019, 2020 წლებში და "აქ სასკანდალო არაფერია".

"2009 წელს იქნა შეძენილი კონკრეტული ნივთიერება, რომელიც იქნა გამოყენებული, ხო? რა არის ეს ნივთიერება? რა იყო ეს ნივთიერება, არ ვიცი. ამაზე ისაუბრებს ალბათ გამოძიება, მაგრამ კიდევ ერთხელ — სასკანდალო აქ არაფერი არ არის. 2009 წელს იქნა შეძენილი აღნიშნული ნივთიერება, რომელიც აქტიურად გამოიყენებოდა როგორც 2009-ში, 7-დან სხვათა შორის, 2007 წელს, 2008 წელს, 2009 წელს, 2010 წელს და ასე შემდეგ. ჯერ 7-ში, მერე 9-ში 2 სხვადასხვა შესყიდვა განხორციელდა... ამას გამოძიება შეისწავლის, ეს არ არის ჩემი პრეროგატივა... მაცალეთ, მაცალეთ, მაცალეთ, ნახეთ, 2007-ში, 8-ში 9-ში, 10-ში, მერე 2019-ში, 20-ში და ასე შემდეგ გამოიყენებოდა კონკრეტულო ნივთიერება, რომელიც იქნა შეძენილი 2007 და 2009 წლებში", — განაცხადა ირაკლი კობახიძემ.

ოცნების პრემიერი ამბობს, რომ "ვახტანგ გომელაურმა დაადასტურა ის, რომ ის ფხვნილი და სხვა საშუალებები, რომელიც იქნა გამოყენებული, შეძენილი იქნა 2007 და 2009 წელს და ის კი ქიმიკოსი არ არის, რომ 2007 წელს და 2009 წელს შეძენილი ფხვნილი გადაემოწმებინა"

"თქვენ უნდა ნერვიულობდეთ თქვენი პარტიის ლიდერზე, ჩვენ ვანო მერაბიშვილზე არ ვნერვიულობთ. გამოძიება მშვიდად წარიმართება და დაადგენს ყველაფერს. თქვენ შეგიძლიათ ინერვიულოთ ვანო მერაბიშვილის ბედზე. თეორიულად შეიძლება დადგეს ვანო მერაბიშვილის პასუხისმგებლობა, შოთა უტიაშვილის პასუხისმგებლობა. ...შსს-მ იცის, რომ ფხვნილს იყენებს და ფხვნილის შემცველობასთან დაკავშირებით 2007 და 2009 წელს იქნა მიღებული გადაწყვეტილება. ...სკანდალი დამთავრებულია, სკანდალი ჩაშლილია, BBC-ის მიერ, სპეცსამსახურების ხელწერით შექმნილი ხელოვნური სკანდალი საპნის ბუშტივით გასკდა. ...ვახტანგ გომელაურმა დაადასტურა ის, რომ ის ფხვნილი და სხვა საშუალებები, რომელიც იქნა გამოყენებული, შეძენილი იქნა დიახ, 2007 და 2009 წელს. ეს დაადასტურა გომელაურმა. ვახტანგ გომელაურს უნდა სცოდნოდა ფხვნილის დანიშნულება და ვახტანგ გომელაური არ არის ქიმიკოსი, რომ 2007 წელს და 2009 წელს შეძენილი ფხვნილი გადაემოწმებინა. სკანდალი ჩაიშალა დანარჩენს გეტყვით სუს-ი", — განაცხადა ირაკლი კობახიძემ BBC-ის გამოძიებაზე.

კობახიძის თქმით, "BBC-ის სიუჟეტი არის სკანდალის შექმნის იაფფასიანი მცდელობა". მან გაიხსენა 9 აპრილის მოვლენები და თქვა, რომ მაშინ დიდი მომართვიანობა იყო, ახლა კი მიმართვიანობაც კი არ იყო კლინიკებში.

"მიმართვიანობაც კი არ იყო კლინიკების მიმართ. თქვენ გახსოვთ მაგალითად 9 აპრილის დროს რამხელა მიმართვიანობა იყო, რამდენი ხანი გრძელდებოდა პაციენტების მკურნალობა და ა.შ , როდესაც კონკრეტული ნივთიერება იქნა გამოყენებული. აქ არ ყოფილა არავითარი მიმართვიანობაც კი, საერთოდ არავითარი... ის მნიშვნელობა აქვს, რომ ხელოვნურად ცდილობთ შექმნათ სკანდალი. იქიდან, სადაც სკანდალი არ არსებობს", — თქვა კობახიძემ.

შეგახსენებთ, რომ BBC-იმ 1-ელ დეკემბერს ჟურნალისტური გამოძიება გამოაქვეყნა, სადაც ნათქვამია, რომ ქართულმა ოცნებამ გასული წლის საპროტესტო აქციების დასაშლელად მოქალაქეების წინააღმდეგ პირველი მსოფლიო ომის ქიმიური იარაღი გამოიყენა".