დონის როსტოვში მდებარე სამხრეთის სამხედრო ოლქის სასამართლომ დაღესტნელ ბლოგერ არსლან მირზაევს, რომელიც ალი ჩარინსკის ფსევდონიმითაც წერდა, რვა წლით თავისუფლების აღკვეთა შეუფარდა. მას ბრალად ტერორიზმის საჯარო გამართლება და რუსეთის შეიარაღებული ძალების შესახებ ცრუ ინფორმაციის გავრცელება ედება.

განაჩენი ოთხშაბათს გამოცხადდა, დამატებით კი მირზაევს 1 მილიონი რუბლის (დაახლოებით 12,800 დოლარის) ჯარიმაც დაეკისრა. მიუხედავად ამისა, განაჩენი ჯერ ძალაში არ შესულა და შესაძლოა გასაჩივრდეს.

როგორც სამხრეთის სამხედრო ოლქის სასამართლოს პრესსამსახურის Telegram-არხი იუწყება, მირზაევის წინააღმდეგ საქმე 2022 წლის ბოლოს აღძრეს. გამოძიების მიხედვით, საქმე მის პუბლიკაციებთან იყო დაკავშირებული, რომელშიც ის რუსეთის ხელისუფლებისა და სამხედრო სტრუქტურების ქმედებებს კრიტიკულად აფასებდა. საქმის მასალები სასამართლოს 2025 წლის ივლისში გადაეცა.

სასამართლო დოკუმენტების თანახმად, 2022 წლის 20 მარტიდან 7 აპრილის პერიოდში, ოდესაში ყოფნისას, მირზაევი სოციალურ ქსელებში ავრცელებდა ფოტოსურათებსა და ტექსტურ მასალებს ბუჩასა და მარიუპოლში მომხდარი მოვლენების შესახებ. სასამართლომ დაადგინა, რომ აღნიშნული პოსტები შეგნებულად შეიცავდა ცრუ ინფორმაციას, რომელიც ფაქტობრივ რეპორტაჟად იყო წარდგენილი.

ცალკე ბრალდებები უკავშირდებოდა 2023 და 2024 წლების პოსტებს. სასამართლოს თანახმად, მირზაევი აქვეყნებდა ვიდეოჩანაწერებს, რომლებშიც ტერორიზმის "იდეოლოგიისა და პრაქტიკის სწორად აღქმა" იყო ნაჩვენები.

განაჩენის გამოტანის მომენტში მირზაევი რუსეთის ფარგლებს გარეთ იმყოფებოდა. მას სოციალურ ქსელებში სასამართლოს გადაწყვეტილებაზე კომენტარი არ გაუკეთებია. მისი Telegram-არხი, რომელიც ადრე მასალის გასავრცელებლად გამოიყენებოდა, ახლა გაუქმებულია, ხოლო ძველი პოსტები წაშლილია. ის Instagram-სა და Facebook-ზე ის კვლავ აქვეყნებს საბრძოლო ხელოვნებასთან დაკავშირებულ კონტენტს.

არხის აღწერის მიხედვით, მირზაევი საზოგადოებრივ საქმიანობას 2012 წლიდან ეწევა, მათ შორის ხელმძღვანელობდა უფლებადამცველ ორგანიზაციას "მუსლიმების უფლებებისთვის რუსეთში".

2022 წელს ის პოლიტიკური მიზეზების გამო უკრაინაში გადავიდა. იმ დროისთვის მის Telegram-არხს 3000-ზე მეტი გამომწერი ჰყავდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.