იუსტიციის მინისტრის, თეა წულუკიანის ცნობით, 25 სექტემბრის სხდომაზე ევროსაბჭოს მინისტრთა კომიტეტმა რუსეთს საქართველოსთვის დაკისრებული კომპენსაციის გადახდა შეახსენა, როგორც "უპირობო ვალდებულება". საქმე ეხება ე.წ. დეპორტირებულების საქმეს, რისთვისაც ევროსასამართლომ 10 მილიონი ევროს ოდენობის კომპენსაციის გადახდა რუსეთს დააკისრა.

"დებატების დროს რუსეთის მხრიდან იყო სხვადასხვა ტიპის წინააღმდეგობები, ისინი ითხოვდნენ ან ვადა გადწეულიყო ან სხვა რაიმე შეღავათი ყოფილიყო, თუმცა მინისტრთა კომიტეტმა რუსეთის ფედერაციას შეახსენა რომ ევროპული სასამართლოს გადაწყვეტილება 10 მილიონის ჩარიცხვაზე, არის რუსეთისთვის უპირობო ვალდებულება და რომ ეს თანხა უნდა ჩაირიცხოს უმოკლეს ვადებში", — თქვა თეა წულუკიანმა მთავრობის სხდომის დასრულების შემდეგ.

მინისტრის თქმით, ამ საკითხის მომდევნო განხილვა შედგება წლის ბოლოს, დეკემბერში.

ევროსასამართლომ დაადგინა, რომ იმ დაზარალებულებმა, რომელთა მიმართ დაირღვა კონვენციის მე-4 მუხლი (კოლექტიური გაძევება) უნდა მიიღინ კომპენსაცია 2 000 ევროს ოდენობით. ხოლო, მათ, ვის მიმართაც დაირღვა კონვენციის მე-5&1 მუხლი (თავისუფლების უკანონო აღკვეთა) და მე-3 მუხლი (პატიმრობის არაადამიანური და დამამცირებელი პირობები), უნდა მიიღონ 10-15 ათას ევრომდე ოდენობით კომპენსაცია, რაც ზუსტად განისაზღვრება საპატიმროში გატარებული დროის ხანგრძლივობაზე.

იუსტიციის სამინისტრომ ევროსასამართლოში 1 795 ადამიანის სია წარადგინა. საქართველოს მთავრობამ აღნიშნულ საქმეზე საჩივარი სტრასბურგის სასამართლოში 2007 წლის 26 მარტს შეიტანა.